Қарағандыдағы кремний зауытына 258 млн. теңге айыппұл салынды

ҚАРАҒАНДЫ. 17 маусым. Табиғатты қорғау прокуратурасы Қарағандыдағы металлургиялық кремний шығаратын зауытты шөміштен қысты. Облыстық экология департаменті қызметкерлерінің тексеруі барысында аталған кәсіпорынның табиғатты ластағаны анықталып, сот шешімімен оған 258 миллион теңге айыппұл салынды. Бұл туралы Қарағанды облыстық экология департаменті хабарлады. Зауытта 2011 және 2012 жылдары екі бірдей кен термиялық пеш жұмыс істеген. Бұл пештердің мұржасына орнатылған тазарту қондырғылары болғанымен, ара-тұра улы газ ауаға жайылып тұрыпты. Нақтырақ айтар болсақ, 2011 жылы аталған қондырғы істен шығып, 29,5 сағаттай, ал 2012 жылы 253 сағат шамасында өшіп тұрған. Соның кесірінен улы газ ауаға емін-еркін жайылған. Мамандар қоршаған ортаға келтірілген залалды шотқа қағып, табиғат 258,8 миллион теңге шамасында зиян шекті деген қорытындыға келді. Маусым айының 9-ында болған экономикалық сот кремний зауытына 258,8 миллион теңге айыппұл кесіп, кәсіпорыннан 7,7 миллион теңге көлемінде мемлекеттік баж салығын алу жөнінде шешім шығарды. Қайрат Әбілдинов. Дерек: Қарағанды облыстық экология департаменті. Сурет: egemen.kz.