Қоғам әйелдердің белсенділігімен әдемі

Кеше Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссия төрайымының орынбасарлары, Парламент Мәжілісінің депутаты Е. Тарасенко мен Орталық сайлау комиссиясының мүшесі Л.Сүлеймен Қарағанды, Теміртау қалаларында жұмыс сапарымен болды. Ұлттық комиссия өкілдері облыс әкімі Нұрмұхамбет Әбді­бековпен әңгімелесуде өңірдегі әйелдердің қоғамдық-саяси жұмыстарға, экономика саласына қатысуы, Мемлекет басшысының дамуды одан әрі нығайту үшін белгілеген бес институттық реформасын жүзеге асырудағы үлесі туралы мәселелерді талқылады. Аймақ басшысымен кездесуден соң облыс әкімі жанындағы әйелдер істері және отбасылық-демографиялық саясат жөніндегі ко­миссияның кеңейтілген отырысы өтті. Онда селекторлық ре­жімде қалалар мен аудандар әкімдерінің орынбасарларымен күн тәртібіндегі мәселе бойын­ша келелі әңгіме қозғалды. Отырысты ашқан Елена Тарасенко өз сөзінде «Елбасының «Нұрлы Жол – болашаққа бас­тар жол» Жолдауында алға қойылған басым бағыттарды, сондай-ақ, бес институттық реформа міндеттерін орындауға қазақстандық әйелдер де белсене атсалысуда деп нық сеніммен айта аламыз. Біздің негізгі жұмысымыз осы бағыттағы өңірлік дейгейдегі іс-шараларды күшейтуге арналады. Бұлар олардың жұмысқа орналасуын қамтамасыз ету, кәсіпкерлігін қолдау, бизнестің жауапкершілігін арттыру, жаңа экономикалық сая­сат аясында инфрақұрылымдық жо­баларға кеңінен қамту болып табылады», деді. Ал Ләззат Сүлеймен әйелдермен нақ­ты жұмыс істеуді күшейту, олар­дың мүдде-тілектерін білу, оған биліктің назарын аудару, тұрмысы қолайсыз топпен тікелей байланыс жасау, қоғамда орын алатын теріс факторлардың  (балаларға зорлық-зомбылық және қатыгездік көрсету, өзіне өзі қол жұмсау, некеге ерте отыру, жасөспірімдік жүктілік, т.б) алдын алу үшін жұмыс пәрменділігі мен тиімділігін жақсарту керектігін айтты. Отырыста облыстық денсаулық сақтау, білім басқармаларының есептері тыңдалды. Жұмыс сапары барысында Қарағанды және Теміртау қалаларындағы «Қарағанды үй комбинаты» ЖШС-інде «Шапағат» балалар үйінде, өмірде қиын жағдайға тап болушы әйелдерге арналған «Мой долг» дағдарыс орталығында кездесулер өтті. Айқын НЕСІПБАЙ, «Егемен Қазақстан». Қарағанды облысы.