Дәулетті қалаға сәулеті әр бермейтін әрі тұруға да жарамсыз бұл үйлер алдағы екі-үш жылда толықтай сырылатын болды. Өйткені облыс орталығында реновация жобасы басталды.
– Негізі қалада тұруға жарамсыз үйлердің тұрғындарын басқа жайларға көшіру 2021 жылы басталған еді. Сол жылы 267 пәтерге бағалау жүргізіліп, тұрғындарға өтемақы төлеу көзделді. Бұл мақсатқа бюджеттен 1,5 млрд теңге қарастырылды. Нәтижесінде, 144 үйдің тұрғындары жалпы сомасы 970 млн теңгені құрайтын тиісті өтемақыларын алды. Ал қалған 116 үйге өтемақы берілмеді. Неге? Өйткені кейбір пәтерлердің мұрагерлік мәселесі дұрыс шешілмеген болып шықты. Кейбір пәтерлердің нақты иесін анықтау мүмкін болмады. Өтемақы мөлшерін азсынған адамдар да болды. Былтырдан бері қаладағы апатты үйлерді бұзып, олардың тұрғындарын басқа жайларға көшіріп жатырмыз. Қалада үй құрылысын жүргізу ауадай қажет. Өйткені сұраныс жоғары, – дейді Жезқазған қаласының әкімі Қайрат Шайжанов.
Ол қалада бастау алған реновация жобасына бюджеттен ешқандай қаражат жұмсалмайтынын айтқанда сенер-сенбесімізді білмей қалдық. Сонда қалай? Сөйтсек, мәселе былай екен.
Қаладағы реновация жобасына қатысты құрылыс жұмыстарын жүргізуді А.Байділдаев басқаратын «Самға» фирмасы өз мойнына алды. Фирма бұрынғы ағаш үйлердің тұрғындарына қазір қанша көлемдегі пәтерде тұрып жатыр, өзі салатын үйден нақ сондай көлемді тегін береді. Ал егер жаңа пәтердегі көлем бұрынғыдан асып кететін болса, сол артық көлемнің ғана ақысын төлейді. Тұрғындар мұндай ұсынысқа толық қолдау танытып отыр.
Қазір «Самға» қаланың Абай көшесінің бойындағы бірнеше шағын сауда нүктелерін сатып алып, сол дүңгіршектерді сырып тастап, 48 пәтерлік үйдің құрылысына кірісіп те кетті. Бұл үй 2025 жылы наурызда пайдалануға беріледі. Сол кезде осы үйдің маңайындағы «ағаш үйлердің» тұрғындарына жаңадан салынған үйден пәтерлер беріледі. Олар бұрынғы пәтерлерін «Самғаға» өткізеді. Ал фирма сол үйлерді сырып тастайды да, орнына тағы да жаңа үйлер салады.
– Құрылыс жүргізу үшін ең керегі – жер. Бұл мәселені біз қаланың орталығындағы ескі үйлерді сыру, бұзу арқылы шешуді ұйғардық. Қабылданған шешім қалаға да, тұрғындарға да, фирмаға да пайдалы болды деген ойдамыз. Бұл жоба алдағы үш жылды қамтиды, – дейді Қайрат Абдоллаұлы.
Сонымен, Жезқазған жаңарғалы жатыр. Жоба бойынша барлығы 23 үй бұзылады. Бұларда 184 пәтер бар. Олардың барлығына сол сырылған орындарға салынатын 48 немесе 60 пәтерлік 6 үйден жаңа пәтерлер беріледі. Ал қалғанын фирма нарық бағасымен сатады.
Іздене білсе, кез келген тығырықтан шығуға болатыны жөнінде көп айтылады. Жезқазғандағы реновация жобасы – осының нақты көрінісі іспетті. Әйтпесе көптеген жыл бойы айтылып, бірақ нақты шешімі табылмай келе жатқан өткір мәселенің түйінін бюджетке ешқандай салмақ түсірмей-ақ тарқатудың жолын тауып, сол жобаны іске асыруға кірісуді басқаша қалай бағалауға болады?
Жезқазған қаласы
