Оралда 6 жыл жалған дипломмен жұмыс істеген маман ұсталды

ОРАЛ. 11 маусым. Батыс Қазақстан облысының орталығы – Орал қаласындағы су спорты бойынша балалар мен жасөспірімдер спорт мектебі директорының орынбасары Райгүл Елесованың Қазақ спорт және туризм академиясының бітіргені жөніндегі дипломы жалған болып шықты. Бұл туралы egemen.kz хабарлады. Осы дерекке байланысты Орал қалалық ішкі істер басқармасы тиісті тергеу жүргізуде. Батыс Қазақстан облыстық дене тәрбиесі және спорт басқармасының бастығы Азамат Бекет оның жалған дипломмен қызметке бұдан 6 жыл бұрын алынғанын айтты. Яғни, Азамат Бекет басқармаға басшы болып келген кезге дейін қабылданған. Алайда ол Райгүл Елесованың жалған дипломмен жалақы алып жүргеніне дер кезінде бақылау жасай алмағанына өкінішін білдіруде. Су спорты бойынша балалар мен жасөспірімдер мектебінде бұдан басқа да заңсыздықтар мен келеңсіздіктер кездескен. Оны осы мектептің оқушылары ғана емес өзге тұлғалар да пайдаланып келген. Бассейнді тиісті медициналық құжаты жоқ адамдар жеке мүдделері үшін жалға алып отырған. Ең сорақысы, су бассейні оқу-үйрену уақыты кезінде жалға алынған. Алайда бұл деректі Азамат Бекет жоққа шығарды. «Бассейндегі жолақтарды өзге тұлғалар тек сабақтан тыс кезде ғана пайдаланды», – дейді ол. Көрсетілген деректер ойынша Орал қалалық прокуратурасы оны қалпына келтіру жөнінде наразылық енгізді. Темір Құсайын. Дерек: egemen.kz. Сурет: lady.ru.