Қаламгерге құрмет

Ел газеті «Егемен Қазақ­станның» 95 жылдық биігінде басылымның белді журналистері де марапатталуда. Таяуда газет шолушысы Сұңғат Әліпбай «Өскемен қаласының құрметті азаматы» атанды. Журналиске құрметті атақты қала әкімі Темір­бек Қасымжанов табыс етті. – Менің журналистік жолым өте бай. Себебі, алғашқы еңбек жолымды аудандық газеттен бас­тадым. Журналистік ғұмырымда ауданнан республикалық деңгейге дейінгі баспалдақты жүріп өттім. Өзімді баспасөз саласындағы бақытты жандардың қатарына жатқызамын, – деді С.Әліпбай. Ол аудандық газетте тілші, бөлім меңгерушісі, аудандық радио хабарларын ұйымдастырушы, Шығыс Қазақстан облыстық «Ком­мунизм туы» газетінің Зай­сан, Марқакөл, Күршім аудандары бойынша меншікті тілшісі, облыс­тық газеттің редакция аппара­тында тілші, аға тілші, экономика бөлімінің редакторы болды. Кейіннен «Егемен Қазақстан» республикалық газетінің экономи­калық шолушысы ретінде көптеген талдамалық мақалалар жазып, түрлі халықаралық, республикалық байқаулардың жеңімпазы атанды. Оқырмандар қарымды қа­лам­гер, жүйрік журналист деп білетін әріптесіміз өзінің жас­тық шағы өткен, журналист ретін­де қалыптасқан Өскемен шаһары әрдайым жүрегінің бұры­шында тұратынын жеткізіп, жерлес­терінің ыстық ықыласы үшін ризашылығын білдірді. Думан АНАШ, «Егемен Қазақстан». ӨСКЕМЕН.