Білім • 10 Маусым, 2024

Баланы бірінші сыныпқа қабылдау үшін қандай құжаттар сұралады?

88 рет
көрсетілді
1 мин
оқу үшін

Оқу-ағарту министрлігі бүгінге дейін 1-сыныпқа қабылдау үшін 240 мыңнан астам өтінім келіп түскенін хабарлады, деп жазады Egemen.kz.

Баланы бірінші сыныпқа қабылдау үшін қандай құжаттар сұралады?

Фото: Оқу-ағарту министрлігі

Жаңа оқу жылынан бастап мектеп табалдырығын аттайтын оқушылардың ата-анасынан өтінімдер 1 сәуірден бастап қабылдана бастады. Құжат қабылдау 31 тамызға дейін жалғасады.

«Бүгінгі таңда 242 мыңнан астам өтінім келіп түсті. Бірінші сыныпқа қабылдау бойынша ең көп өтінім Түркістан, Алматы, Қызылорда облыстарында, сондай-ақ Алматы, Астана қалаларында тіркеліп отыр», делінген Оқу-ағарту министрлігі Орта білім беру комитетінің хабарламасында.

Ата-ана балаларының құжаттарын еgov.kz  электронды үкіметінің веб-порталы арқылы бере алады.

Баланы бірінші сыныпқа қабылдау үшін сұралатын құжаттар: 

1) Ата-анасының немесе заңды өкілдің өтініші;
2) 065/е нысанындағы «Профилактикалық екпелер картасы» және №052-2/е нысанындағы «Бала денсаулығы картасы» медициналық құжаттары;
3) Баланың 3х4 см көлеміндегі цифрлық фотосуреті.


Өтініштер демалыс және мереке күндерін қоспағанда, дүйсенбі-жұма аралығында қабылданады. Министрлік дерегінше, биыл 370 мыңнан астам бала бірінші сыныпқа қадам басады.