Жүрегі оң жағындағы жігіт

Қалай білмей жүргенбіз?.. «Казталов ауылында адам таби­ғатында сирек кездесетін жүрегі оң жақта орналасқан азамат бар», деген әңгімені естігенде сенбедім. Ал ол кім дейсіз ғой?... Аудандық кітапхана ғимаратында күзетші болып істейтін Талап Нығметовтің 36 жасқа толып кеткен Амангелді деген ұлы. Ағаның үйіне бардым. Зайыбы Роза апай қарсы алды. Келген шаруамды айтқаннан кейін: «Иә, бәрі дұрыс, баламыздың жүрегі оң жақта. Басқа балаларымдай ержетті. Қазіргі күнде отбасылы. Орал қаласында тұрады. Денсаулығында еш айырмашылық жоқ», – деді. Апайдан кейін Талап аға әңгімеге араласты. «Мынандай қызық айтайын, – деді. – Аман­гелдінің 10 жастағы кезі. Балам қораның жанында ойнап жүрген. Сол кезде ауылдағы тентек бұқа іргесіне су кетіп тұрған қораның жанына сүйкенді. Құлағалы тұрған қораның жақтауы бұқаның күшіне шыдасын ба? Қабырға баланың үстіне құлады. Оны топырақтың астынан шығарған соң, дәрігерге алып бардық. Жаңадан келген жас хирург Ораз Сариев баланың жүрегін тыңдады. Жүрек соқпағаннан кейін, ол шошып кетті. Мән-жайды және баланың есепте тұрғанын білгеннен кейін ем қабылдады. Осы қызық жайт есімізде қалды». Қазіргі күнде Амангелді құ­рылыс жұмысында істеп жүр екен. Бірақ, айтуынша денесіне күш түсетін көрінеді. Өйткені, жүрегі оң жақтағылар солақай болуы керек екен. Сонда денеге күш түспейді деген ұстаным бар. Бұдан кейін Казталов орта­лық­тандырылған аурухана ди­ректорының орынбасары Ботагөз Ғұмарованы әңгімеге тарттық. – Амангелді Нығметов дәрі­герлік есепте тұрады. Жыл сайын байқаудан өткіземіз. Денсаулығы қалыпты. Мұндай жағдайлар адамдарға тұқым қуалаушылық арқылы беріледі. Ауданымызда жүрегі оң жақта орналасқан бір ғана адам осы азамат болып табылады. Адам баласының қуан­ғанда, қайғырғанда жүрегі атша тулайды. Сол кезде бәрі де сол жағын ұстайтыны анық. Амангелдіге денсаулығың мықты болсын дейміз. Гүлфия КӨШБАЕВА, журналист. Батыс Қазақстан облысы, Казталов ауданы.