Басқосуда Астана медицина университетінің басқарма төрағасы-ректор Камалжан Надыров Еуразия халықаралық мектебінің елдегі оториноларингология бағытына оң әсер ететінін жеткізді. Ол жас мамандарды осы мүмкіндікті барынша тиімді пайдалануға шақырды.
«Университеттің 60 жылдық мерейтойы аясында өтіп отырған «Плужников оқуларының» мәні бөлек. Өйткені, жас оториноларингологтердің алдында Еуропа, Мысыр, Сингапур, Орталық Азия елдері мен Ресейдің белгілі ғалымдары баяндама оқиды. Тәжірибесін бөліседі. Шетелдік сарапшылардың кәсіби көзқарасы Қазақстанға пайдасын тигізеді деп сенеміз. Осы арқылы маңызды сала дамып, білікті дәрігерлердің қатары артады деген ойдамын», деді Камалжан Талғатұлы.
Жиында еліміздің дәрігерлері шетелдік танымал ғалымдар мен сарапшылардың баяндамаларын тыңдады. Ғалымдардың саладағы озық жетістіктерімен танысып, білікті мамандармен емен-жарқын пікір алысты. Сонымен бірге осы іс-шара барысында Президент Іс басқармасы Медициналық орталығы ауруханасының отоларингологиялық клиникасында, Астана қаласы әкімдігінің №1 көпсалалы қалалық ауруханасының Оториноларингология орталығында лор ағзаларының заманауи эндоскопиялық хирургиясы жөнінде кәсіби кеңес беріліп, шеберлік сағаты өтті.
