Аймақтар • 07 Мамыр, 2024

Жұрт ұсынысы жұмысты жүйелейді

47 рет
көрсетілді
4 мин
оқу үшін

Денсаулық сақтау министрі Ақмарал Әлназарова Қызылорда облысына жұмыс сапарымен келіп, жергілікті мамандармен, жұртшылықпен кездесті. Облыс әкімі Нұрлыбек Нәлібаев пен министр кездесуінде денсаулық сақтау саласының негізгі көрсеткіштері мен өзекті мәселелері сөз болды.

Жұрт ұсынысы жұмысты жүйелейді

«Мемлекет басшысының, Үкіметтің тапсырмасына сәйкес біз денсаулық сақтау саласының дамуына, медицина ұйымдарының материалдық-техникалық базасының нығаюына, олардың қажетті медициналық құрал-жабдықтармен қамтамасыз етілуіне, тапшы кадрларды даярлауға ерекше көңіл бөліп келеміз. Ел игілігіне жаңа ғимараттар табыстап, сала мамандарының халыққа сапалы қызмет етуі үшін барлық жағдай жасалып отыр. Осының нәтижесінде өткен жылмен салыстырғанда ана өлімі 5,7 есе, сәбилердің шетінеуі 13,4%-ға төмендеді. Былтырғы қорытындыда 3 негізгі медико-демографиялық көрсеткіштің нысаналы индикаторына қол жетті. Өткен жылы республикалық және жергілікті бюджеттен 52,1 млрд теңге қаралып, 23 медициналық нысан бой көтерді. Оның 17-сінің құрылысы аяқталды. Биыл 5,5 млрд теңге қаржы бөлініп, 5 нысан құрылысы жүргізілді, оның екеуі пайдалануға беріліп отыр. Бұған қоса «Ауылдық денсаулық сақтауды жаңғырту» ұлттық жобасы аясында 11 нысан құрылысына сатып алу кон­курсы жарияланды. Мердігерлер анық­талысымен құрылысты бастаймыз. Ны­сандар жыл соңына дейін қолданысқа беріледі», деді облыс әкімі.

Облыс басшысы министрден Қы­зылорда қаласы мен аудандарда са­лынуға тиіс бірқатар медициналық нысан құрылысына қаржы бөлуге ық­пал етуді сұрады. Қызылорда қала­сын­­дағы №4 және №5 қалалық ем­ханалардың құрылысы шешімін тап­пай келе жатқанына біраз болды. Об­лыстық медициналық жедел жәрдем стансасының бөлімшелеріне модульдік жедел жәрдем стансасын салу қажеттігі де анық байқалып отыр.

Ақмарал Шәріпбайқызы аймақтың медицина саласындағы жетістіктерін атап өтіп, өңір басшысы көтерген мә­селелер зерттеліп, шешу жолдары қа­рас­тырылатынын айтты. БАҚ өкіл­деріне арналған брифингте министр Мемлекет басшысының тапсырмасы аясында ауылдық елді мекендердегі бастапқы медициналық-санитарлық көмектің сапасын арттыру жобасы, медицина саласында көрсетілетін қызметтер мен МӘМС жүйесін жетілдірудің маңызына тоқталып өтті. Өңірлердегі медицина саласының әлеуетін арттырып, бағ­дарламалар тиімділігін жүзеге асыруды көздеген сапардың мақсаты да – мамандармен, қарапайым жұртшылықпен жүздесіп, ұсыныс-пікірлерін тыңдау. Жалпы, кейінгі үш жылда сала қызметіне қатысты халықтан түскен арыз-шағымдар еселей артқан. Олардың басым көпшілігі емханалардың қызметіне қатысты болып отыр. Тұрғындарды жолдама алудағы қиындықтар, медициналық көмекпен қамтылудағы тексерістердің ұзақтығы да қат­ты алаңдататыны анықталды. Қазір министрлік осы мәселелерді кезең-кезе­ңі­мен шешуге кірісіп, саладағы бір­қа­тар заңдарға өзгеріс енгізу басталып кетті.

«Біздің саладағы ең өзекті мәсе­лелердің бірі – маман жетіспеушілігі. Осы күні Қызылорда облысының өзін­де ғана 150-ден аса дәрігер маман же­тіспейді. Осыған сәйкес, облыс әкімдігі және облыстық денсаулық сақтау басқар­малары медициналық оқу орындары басшыларымен байланысты жолға қойып, білім алып жатқан студенттердің өңірлерге келіп жұмыс істеуіне мүмкіндік жасап отыр. Елімізде жүрек-қан тамырлары ауруымен ауыратын азаматтардың көбеюі де мәселеге айналып отырғанын білесіздер. Сондықтан да аталған аурудың алдын алу және азаматтарымыздың денсаулығын жақсарту бағытындағы тиісті жұ­мыстар қолға алынды», деді А.Шәріпбаева.

Елдегі демографиялық өсімнің артуы­на үлкен үлес қосып отырған Түркістан мен Қызылорда облыстары үшін балалар дәрігерінің орны бөлек. Осы сапарда министрліктің жауапты өкілдерінен бөлек мамандар даярлайтын жоғары оқу орны басшылары да жұрттың ұсы­ныс-пікірлеріне құлақ түрді. Сапар аясында министр Жаңақорған, Шиелі аудандарында болып, ондағы емдеу мекемелерінің жұмысымен танысты. Облыс орталығындағы көпсалалы аурухана жұмысын көрді, тұрғындармен кездесті. Азаматтарды жеке өтініштері бо­йынша қабылдады.

 

Қызылорда