Фото: pixabay.com
Кәсіпкерлер палатасының бұл бастамасы облыс басшылығы тарапынан қолдау тауып отыр.
«Біз ай сайын әкімдіктің құзырлы басқармаларымен бірлесе отырып, аталған тізілім арқылы бизнестің дамуына бөгет болып отырған күрмеулі мәселелерді дәл анықтап, сарапқа салып, қажет болған жағдайда кейбір заң күші бар құжаттарға өзгеріс енгізуді талап ететін ұсыныстарды қарастырамыз. Бұл мәселені жедел шешуге және ірі инвестициялық жобалардың айналасындағы шағын бизнестің дамуына ықпал етеді», дейді облыстық кәсіпкерлер палатасының директоры Данияр Күзенбаев.
Кәсіпкерлікті дамытуға арналған ұлттық жоба аясында өңірде «Қызметтік қолдау», «Кеңес беру», «Іскерлік байланыс» және «Мен кәсіпкермін» деп аталатын төрт бағыттағы қолдау шаралары тиімді іске асырылып жатыр.
Мәселен, 2023 жылы палата мамандары 1 189 кәсіпкерге қызметтік қолдау көрсетіп, 13 мыңнан астам тұрғынға жеке кәсібін ашу, бизнесін кеңейту жөнінде кеңес берген. Былтырдың өзінде облыста 246 жеке кәсіпкерлік нысаны мен ЖШС ашылды. Палата өкілдерінің көмегімен жалпы сомасы 1,5 млрд теңге болатын 198 жоба іске қосылып, 171 жаңа жұмыс орны ашылды.
Өткен жылы «Іскерлік байланыс» жобасы бойынша 3 кәсіпкер Германия кәсіпорындарында болып, батыста бизнес жүргізудің қыр-сырымен танысып, тәжірибе алмасып келді. Тағы 3 кәсіпкер Еуропа кәсіпорындарына барып, бизнес-тағылымдамадан өтті. Германиямен іскерлік қатынас биыл да жалғасын таппақ. Қазір бизнес-тағылымдамадан өтуге ниетті кәсіпкерлерден өтініш қабылданып жатыр. Мұның сыртында, «Іскерлік байланыс» жобасына қатысып жатқан бірнеше кәсіпкерді Жапонияға жіберу жоспарланып отыр.
Өңірде «Мен кәсіпкермін» жобасы «Кәсіпке бағыт» және «Кәсіпкер әйелдерді қолдау орталығы» деп аталатын екі бағыт бойынша жүзеге асырылып жатыр. Біріншісі жылына, кем дегенде, 40 кәсіпкерге салалық білім беруді көздейді. Аталған бағыт бойынша былтыр Федоров ауданында 15 кәсіпкер сүт өнімдерін өңдеудің өндірістік жолдарын игерсе, Қостанай ауданында 26 кәсіпкер жылыжай шаруашылығының қыр-сырын меңгеріп шыққан.
«Кәсіпкер әйелдерді қолдау орталығы» бағыты аясында 400-ге жуық азаматша бизнес жүргізуге қатысты кеңес алған. Өңірде кәсіпкерлікпен айналысатын әйелдер жыл санап көбейіп келе жатқаны байқалады. Мысалы, 2023 жылы бизнеске бет бұрған қыз-келіншектердің саны 26 474 болса, жыл соңына қарай бұл көрсеткіш 28 мың 305-ке жеткен. Биыл «Атамекен» ҰП филиалы Қостанайдағы кәсіпкер әйелдер шығарып жатқан өнімдердің ауқымды көрмесін ұйымдастыруды көздеп отыр. Оған кем дегенде 120 кәсіпкер қатысады деп күтілуде.
Қостанай облысы
