Еңбек және халықты әлеуметтік қорғау министрлігі электронды еңбек биржасы порталында жұмыс іздеушілер мен жұмыс берушілер үшін бос орындар мен түйіндемелер бойынша ұсынымдарды сәйкестендіріп, жүйелеуге мүмкіндік беретін жасанды интеллект моделін іске қосты. Нейрожелі аталған министрліктің ақпараттық жүйелерінің дерегімен арнайы оқытылған. Бұл жүйе LinkedIn Recruiter іздеу және ұсыныстар жүйесіне ұқсас озық тәсілмен әзірленген.
Түйіндемелер мен бос жұмыс орындарының мазмұнын тиімді талдауға мүмкіндік беретін табиғи тілді өңдеу модельдері екі тараптың да жұмысын едәуір жеңілдете түседі. Аталған механизм жұмыс берушілерге жұмысқа қабылдау және кадр резервін қалыптастыру үшін лайықты кандидаттарды жылдам және дәл іздеуді қамтамасыз етсе, ал жұмыс іздеушілерге өзінің талаптарына сәйкес келетін бос жұмыс орындарын тезірек іздеп табуға мүмкіндік береді.
Қысқасы, жасанды интеллект барлық түйіндеменің мазмұнын жақсы түсінеді. Ол жерде жазылған жалақы мөлшері, тұрғылықты жері, көшу мүмкіндіктері, дағдылары сияқты әртүрлі талапты ескере отырып, жұмыс іздеушіге ең қолайлы нұсқаларды ұсынып отырады. Дәл солай жұмыс берушілерге де лайықты ұсыныстар береді.
Еңбек және халықты әлеуметтік қорғау министрлігінің мәліметінше, алдағы уақытта нейрожелінің жұмысы одан әрі жетілдіріледі. Машиналық оқыту алгоритмдерінің жұмысын жақсарта отырып, өтініш берушілерге қосымша білім беру қызметін қосу жоспарда бар.
