Музейдің аға ғылыми қызметкері Гүлзайра Сәбитованың жазуынша, бұл жәдігерді мұражайдың сол кездегі ғылыми қызметкері ақын, сазгер Кәрім Ілиястегі тапсырған. Бөріктің төбесі төрт сай болып келеді. Арасына жүн салып, төбесін сұр түсті матамен қаптаған. Жиегі пұшпақ терімен көмкерілген.
Халық ақыны Молдахмет Тырбиевтің есімі көзіқарақты қауымға таныс. Ол 1881 жылы қазіргі Солтүстік Қазақстан облысының Шал ақын ауданы Тулақ ауылында туған. Бұл ауыл кеңес дәуірінде «Қызылту» кеңшары, кейін «Еңбек» ауылы деп аталған. Молдахмет атамыз – атақты ақын, әнші Үкілі Ыбырайдың туған жиені ғана емес, өнерін қуған шәкірті. Сондай-ақ көрнекті ақын Кәкімбек Салықовтың немере туысқаны.
Молдекең Кәкімбекті бала күнінен өнерге баулып, домбыра үйретеді. Тәлім -тәрбиесін береді. Кәкімбек ағамыз атасы туралы бір естелігінде: «Молдекең молда да, болыс та болған әйгілі ақын, суырып салма айтыскер һәм үздік әнші, тамаша домбырашы. Өлең үйретудегі тәсілі – әу дегеннен бәрімізге өлеңнің сөзін жаздырады, содан соң өзі әдемілеп тұрып үш рет айтып береді. Ал әрі қарай кәдімгі байқау өткізетін профессор сияқты бәрімізді тыңдайтын, ең жақсы айтқанымызды алып қалып, оңаша үйрететін», деп жазыпты.
М.Тырбиевтің Жанақ, Орынбай, Біржан сал, Ақан сері, Жаяу Мұса, Балуан шолақ, Үкілі Ыбырай секілді Арқадағы ақын-жыршылар мен сал-серілердің дәстүрін жалғастырып, солардың шығармаларын кейінгі ұрпаққа жеткізудегі еңбегі өте зор. Сонымен бірге айтыс өнерінің де дамуына зор үлес қосты. Ақынның өзі де өлең жазып, ән шығарған. Оның «Жеңіс» және «Терме» атты әндері кезінде халық арасына кең тараған.
