Пайғамбарымыз (оған Алланың салауаты мен сәлемі болсын): «Кімде-кім Аллаға иман келтіріп, сауабын Алладан үміт ете отырып, Қадір түнін құлшылықпен өткізетін болса, оның өткен барлық күнәлары кешіріледі», деген (Бұхари).
Ал қасиетті Құранның «Духан» сүресінің 3-аятында бұл түннің берекеге толы түн екендігі баяндалады. Ислам ғалымдары осы аят пен хадистерге сүйене отырып, кімде-кімнің құлшылығы, дұға-тілегі мың айдан да қадірлі қадір түніне, сол сәтке сәйкес келетін болса мың ай құлшылық жасағандай, бәлкім одан да көп сауапқа кенеледі деп тұжырымдама жасаған.
Демек, бұл түні көбірек құлшылық жасауға, Алладан біліп және білмей істеген күнәлар үшін тәубе етіп кешірім сұрауға, көбірек Құран оқуға, Пайғамбарымызға салауаттар айтып күн батқаннан таң атқанға дейін уақытты құлшылықпен өткізуге ден қою қажет.
