55 кило салмақ дәрежесінде өнер көрсеткен жерлесіміз, өкінішке қарай, былтырғы жетістігін қайталай алмады. Ташкенттегі додада топ жарған Чонтей Боготадағы бәсекенің қоссайысында 259 (118+141) кило зілтемірді еңсеріп, жүлдеге сынық сүйем қалғанда сүрінді. Бұл нәтижемен ол жалпы есепте төртінші орынға тұрақтады. Дегенмен жұлқа көтеру бағдарламасында 118 килоны көтеріп, әлем чемпионатының кіші «күміс» жүлдесіне ие болды.
Ал бұл салмақтың бас жүлдесі қоссайыста 265 килоны (117+148) басынан асыра көтерген Таиланд өкілі Тхирапонг Силачайдың еншісінде кетсе, күміс медаль Вьетнам спортшысы Сон Дин Нгоге бұйырды. Ол екі жаттығуда 260 килоны (117+143) еңсерді. Ал Чонтейден бір кило артық көтерген Корея өкілі Ким (260 кг, 115+145) үздік үштікті қорытындылады.
