Осы орайда Өскемендегі Д.Серікбаев атындағы Шығыс Қазақстан техникалық университетінің ректоры Жасұлан Шаймарданов Мемлекет басшысының жасаған мәлімдемесіне қатысты өз пікірін білдірді.
– Еліміз үшін бұл да бір сын сағат болды. Көпшілік Мемлекет басшысын ҰҚШҰ әскерлерін елге енгізу туралы шешім қабылдағанына оң қабақ таныта қоймады. Бірақ, осы қадам жағдайды бақылауға алып, өңірлер мен ірі қалалардағы жағдайды тұрақтандыруға мүмкіндік берді, – деп Президентті қолдайтынын жеткізді Ж.Шаймарданов. – Білім беру саласына қатысты айтқан ойлары да өте орынды. Әсіресе техникалық білім беруді нығайта түсу керек дегеніне елең ете қалдық. Халық тығыз орналасқан өңірлер үшін грант мөлшерін ұлғайту керек деді. Ол дегеніміз, азаматтардың білімге деген ұмтылысын арттырады. Мұғалімдер тапшы өңірлерге үздік педагогтарды тарту керектігін де баса айтты. Шынында да, қазір біз мектеп оқушыларының физика-математикалық дайындығы нашар екенін сеземіз. Техникалық білім берудің басымдығы сол, Президент айтқандай, өнеркәсіп инженерлерінің жаңа буынын өсіру, – дейді ректор.
Қалай десек те, елдің экономикасы, әлеуеті, өндірісі дамуы үшін технократ мамандар ауадай қажет. Онсыз еліміздің ілгерілеуі екіталай. Ал техникалық университет сол бағытта жұмыс істеп келе жатқан облыстағы іргелі оқу орын. Президент Қ.Тоқаевтың айтуынша, жақын арада Ресейдің озық техникалық жоғары оқу орындарының филиалдарын елімізде ашу жоспарлануда. 2025 жылға қарай Қазақстанда беделді шетелдік университеттердің кемінде 5 филиалын ашуды көздеп отыр. Оның екі филиалы техникалық бағытта.
– Бұған дейін Республикада жасақталған делегациямыз Ресей Федерациясының үздік техникалық университеттерінде болып қайтқаны туралы жазған едік. Онда Қазақстан мен Ресей Федерациясы арасындағы стратегиялық әріптестіктің түрлі аспектілерін талқылап, өзара іс-қимыл жолдарын белгіледік, белгіленген жоспарлар бойынша жұмысты ұйымдастыру үшін жұмыс тобын құру туралы шешім қабылдадық. Ресей университеттері инженерлік кадрларды даярлауға көмектесуге дайын. Айтар болсам, біздің жоғары оқу орнымыз Мәскеу инженерлік-физикалық институты, Ұлттық ядролық зерттеу университетімен бірнеше жылдан бері ынтымақтастықта жұмыс істеп келеді. 2017 жылдан бастап біздің студенттер ЖОО базасында практикадан өтеді, – деп бұрын да атқарылған жұмыстарға тоқталып өтті.
Енді Президенттің ұсынысынан кейін техникалық университет жұмысы қайта серпіліп, тың жобаларды қолға алады, жаңа бағытта жұмыс істей бастайды. Кәсіби кадрларды дайындап, ел әлеуетінің артуына едәуір септігін тигізері де анық.
