Алаңға жиналған тәртіп бұзушылардың заңсыз әрекетін тоқтатуға полиция қызметкерлерімен қатар «Шығыс» өңірлік қолбасшылығы да жеткен. Арандатушылардың түрлі қысымдарына моральдық-психологиялық тұрғыда табандылық таныта білген әскери жасақ облыстық әкімдікке ешкімнің басып кіруіне жол бермеді. Қоғамдық тәртіпті сақтау мақсатында жұмылдырылған «Шығыс» өңірлік қолбасшылығына қарасты 19 әскери сарбаз әртүрлі дәрежедегі жарақаттар алды. Оның 8-і Өскемен гарнизоны, 11-і Семей гарнизоны бойынша. «Шығыс» өңірлік қолбасшылығы баспасөз қызметінің бастығы Бағдат Амангелдінің айтуынша, оларға дәрігерлер ем-домдарын жасады, қазір жағдайлары тұрақты.
– Бұл күндері сапқа тұрған әр сарбазға қауіп төнгені белгілі. Қаншама азаматтарымыздан айырылып қалдық. Олардың туған-туыстарына «Шығыс» өңірлік қолбасшылығының жеке құрамы атынан көңіл айтамыз. Ал осынау қиын сәттерде бізбен бірге болған азаматтарға алғысымыз шексіз. Әсіресе кәсіпкерлер қолдау білдіріп, азық-түлікпен қамтып жатты. Енді мұндай тәртіпсіздіктен сақтасын, – дейді Б.Амангелді.
Күштің бірлікте екенін түсінген облыс кәсіпкерлері әскерилерге азық-түлік, ыстық тамақ, сүт өнімдерін әкелді.
– Қыстыгүні күштік құрылымдар күндіз-түні тәртіпті қорғауда тұр. Сондықтан оларға алғыс айтқымыз келеді. Олармен бірге екенімізді, бәріміз бір екенімізді білуі үшін қолдау көрсеткіміз келеді. Ең бастысы, бейбіт өмірге оралып, ұрпақтарымыз алаңсыз өмір сүрсе екен деймін. Тәуелсіздігіміз баянды болсын, – дейді «Майлы дақылдардың тәжірибелік шаруашылығы» ЖШС директоры Фарид Әбітаев.
Сонымен қатар басқа да кәсіпкерлер аймақтағы жаппай тәртіпсіздіктердің алдын алып, жедел әрекет еткен құқық қорғау органдарына, өрт сөндіру бөлімшелеріне, медицина қызметкерлеріне шынайы ризашылықтарын білдірді. Кәсіпкерлермен бірге құқық қорғау органдарының қызметкерлері, облыстық «Халифа Алтай» мешітінің еріктілері қолдау көрсетті. Көпбалалы аналар да қолдан келген көмектерін аяп қалған жоқ.
Шығыс Қазақстанда бүгінгі таңда жағдай тұрақталған. Облыста азық-түлік тауарларын жеткізуде іркіліс жоқ. Коменданттық сағатқа сәйкес барлық өнеркәсіптік кәсіпорындар, дүкендер, дәріханалар мен медициналық мекемелер жұмыс істейді. Коммуналдық қызметтер, әлеуметтік нысандар, қоғамдық көлік жұмысы штаттық режімде.
Айта кетейік, Шығыс Қазақстан өңірінде 5-9 қаңтар аралығында мыңнан астам адам ұсталып, оның 66-сына қылмыстық іс қозғалды, 7 азамат комендаттық сағатты бұзып, әкімшілік жауапкершілікке тартылды.
Шығыс Қазақстан облысы
