Үш раунд бойы классикалық стильде жұдырықтасқан Сәкен бұл күні Хасанбай Дусматовты еркін ұтты. Азулы қарсыласынан айласын асырған қазақ саңлағы әлем чемпионатына тыңғылықты дайындалып келгенін айтты. «Әлемдік додаға барымды салып дайындалдым. Токиода бұйырмаған алтын медальді осы додада алғым келеді. Сондықтан да Белградқа тек алтын жүлде үшін келген жайым бар. Жекпе-жекте жеңіске жетуім үшін барлық жағдайды жасаған жаттықтырушыларға алғысымды білдіремін», деді ол.
Сәкеннен бөлек 75 килограмм салмақта сынға түкен Нұрқанат Райыс та бірінші кездесуін жеңіспен аяқтады. Ол черногориялық Стефан Савковичті еліне қайтарды. Әзірге рингке шыққан төрт боксшымыздың да ұпайы түгел. Бірінші болып жеңісті жорықты Серік Теміржанов (57 килограмм), Абылайхан Жүсіпов (67 килограмм) бастаған болатын.
