Оңтүстік Кореядан жеткізілген аппараттардың құны 700 мың теңгеден асады. Қазіргі таңда бұл медициналық аппарат - пневмонияға шалдыққан науқастарды емдеуде таптырмайтын құрал болып отыр.
Аудан әкімінің орынбасары Бейсенбай Төребеков пен аудандық "Мырзакент" ауруханасының бас дәрігері Берік Есімханов аппараттарды ауруханаға жеткізіп берген кәсіпкердің отбасына алғыс білдіріп, осындай қиын кезеңде халқына сүйеніш бола білген азамат нағыз "бүгінгі күннің батыры" екенін атап өтті.
“Қазір ауруханамызға пневмония диагнозымен түсіп жатқан науқастар көп. Ауру асқынған жағдайда адамның өкпесіндегі тыныс алу жолдарын зақымдайды. Науқасқа оттегі жетіспей қиналады. Міне, осындай жағдайда оттегі концентраторының маңызы зор" – деді "Мырзакент" ауруханасының бас дәрігері Берік Нағашбекұлы.
Айта кетейік, кәсіпкер Данияр Аташов бұған дейін де "Мырзакент" ауруханасына балаларға жедел медициналық қызмет көрсетуге арналған 2 оттегі концентраторын алып берген.
