Халқымызда зейнеткерлерді елдің “алтын қоры” деп салыстыра баға берген тәрбиелі ой қалыптасқан. Еліміздің даму жолын, тарихын сараптауға зейнеткерлер ұдайы зор көңіл бөліп, жүріп өткен жолы мен белесті болжауды қатар ұстанады.
Президентіміздің биылғы Жолдауы – жас ұрпақтан бастап, еңкейген қартқа дейін көңілге қонымды, жаңа онжылдыққа басқан әр қадамның айқын бағдарламасы. Жолдауда Ұлы Отан соғысы ардагерлеріне, зейнеткерлерге, мүгедектерге көрсетілетін көмек, ұдайы қамқорлыққа алу міндеттері қарттардың көңілін бір серпілтіп, мақтаныш сезімін еселей түсті. Жолдаудың басты бір мақсаты ретінде халықтың денсаулығын сақтау, өмір сүру ұзақтығын дамыған елдер қатарына жеткізу мәселесі шын жанашыр адамнан туындайтын ой. Ұзақ жасағысы келген әр адам саламатты өмір салтын дәріптеп, өзімен бірге бала, немересін ертіп, спортпен айналысуы керек деп түсінемін. Біздің отбасы Иванов жүйесімен денсаулығын шынықтырумен айналысады, суда жүзу, спорттық ойындар, жүгіру сияқты шараларға үй ішімізбен қатысамыз.
Биылғы Жолдаудың өзекті тағы бір мәселесі индустриялық-инновациялық бағдарламаны толық, әрі тұщымды талдау арқылы халыққа жаңа жобаның басым жағын ашып көрсетіп, яғни әлемдегі мықты елу елдің қатарына қосылудың айқын жолы – индустриялық-инновациялық жол екенін айғақтады. Бұл бағдарлама – жаңа онжылдыққа қойылған басты мақсат, келешек ұрпақ болашағының негізі, өркендеудің маңызды жаңа табыстары. Жолдаудың бір ерекшелігі, ХХІ ғасырдың алғашқы онжылдығында қол жеткен жетістіктер аталып, түйінді пікірлермен қатар, күнделікті өмірде шешілу сәтін күтіп тұрған мәселелер орынды ескертілді. Бұл – Жолдаудың өміршеңдігі. Жолдау көңілге шабыт толтырып, жоспарланған ізгі істерге жетелейді. Келешекке сенім зор.
Мәрияш САҒЫНДЫҚОВА, білім саласының ардагері. Павлодар облысы, Екібастұз қаласы.