ҚР ИДМ инвестициялар комитеті төрағасының орынбасары тағайындалды

Қайрат Қарманов ҚР Инвестициялар және даму министрлігінің Инвестициялар комитеті төрағасының орынбасары қызметіне тағайындалды. Бұл туралы ҚР ИДМ-нің Индустрия және туризм департаментінің директоры Марат Иғали мәлім етті. «Қайрат Қармановты ҚР Инвестициялар және даму министрлігінің Инвестициялар комитеті төрағасының орынбасары қызметіне тағайындалуымен құттықтаймын»,-деп жазды ол әлеуметтік желідегі парақшасында. Қайрат Жарылқасынұлы Қарманов 1984 жылы 13 сәуірде дүниеге келген. «Болашақ» бағдарламасы бойынша АҚШ-тың Флоридалық Атлантика университетін және Мичиган мемлекеттік университетін «Қалалық және өңірлік даму» мамандықтары бойынша бітірген. Л.Н.Гумилев атындағы Еуразия ұлттық университетінің «халықаралық құқық» мамандығы бойынша түлегі. Еңбек жолын «Астана қалалық экономика және бюджеттік жоспарлау басқармасы» ММ-ге қарасты «Елорданың тұрақты даму орталығы» ЖШС-ында кеңесші ретінде бастады. 2009 жылдан бастап, ҚР АШМ «Казагроинновация» АҚ «Агроөнеркәсіп кешенінің экономикалық саясат орталығы» ЖШС ТҰК және шетелдік инвесторлармен жұмыс жасау департаментінің кеңесшісі қызметін атқарды. 2010 жылдың сәуір айынан бастап инвестициялық ынтымақтастық департаментінің директоры, «Kaznex Invest» экспорт және инвестициялар бойынша ұлттық агенттігі» АҚ басқарушы директоры ретінде еңбек етті. 2011 жылдың желтоқсан айынан бастап Kaznex Invest» экспорт және инвестициялар бойынша ұлттық агенттігі» АҚ басқарма төрағасының орынбасары болып жұмыс жасады. Соңғы қызметі - 2016 жылдың мамыр айынан бастап Kaznex Invest» экспорт және инвестициялар бойынша ұлттық агенттігі» АҚ басқарма төрағасының кеңесшісі лауазымын атқарды.