Бозымбаев: 2019 жылдан кейін еліміз мұнай өнімдерімен толықтай қамтамасыз етіледі

Қазақстан мұнай өнiмдерімен iшкi сұранысты 2019 жылдан кейiн толықтай қамтамасыз етеді. Бұл туралы ҚР энергетика министрi Қанат Бозымбаев мәлімдеді. «Мемлекет басшысы өз Жолдауында мұнай өңдеу көлемiн арттыру қажеттiгiн ерекше атап өттi. Үш отандық мұнай зауытын жаңғыртқан соң мұнай өңдеу көлемi 2019 жылдан кейiн 14,5 миллион тоннадан 17,5 миллион тоннаға дейiн өседi», – дейді Қанат Бозымбаев Энергетика министрi бензин, дизель отыны, авиаотынның өндiрiсi артатынын айтты. «Мұнай өңдеу зауыты жаңғыртылғаннан кейін iске қосылып, толық жұмыс істей бастаған кезде елiмiздiң iшкi сұранысын отандық мұнай өнiмдерімен толықтай қамтамасыз ететiн боламыз. Жанар-жағар май бойынша импортқа тәуелдiлiк болмайды», – деді Қ. Бозымбаев. Айта кетейік, елімізге жанар-жағармайдың қажетті бір бөлігін Ресейден тасымалдануда. Әсіресе, сұранысы жоғары АИ-92 бензині көршілес елден келеді.