Фируза Шәріпованың жекпе-жегі өтетін күн белгілі болды

Қазақстандық кәсіпқой боксшы қыз Фируза Шәріпова титулды кездесуінің алдында рейтингті жекпе-жегін өткізетін болды. Бұл туралы allfight.ru порталына берген сұхбатында менеджері Сергей Завилейский мәлімдеді. «Біз титулды айқас алдында тағы бір рейтингті кездесу өткізуді жөн көрдік. Фируза қазір физикалық тұрғыдан жоғары деңгейде. Дайындығы толығымен жүріп жатыр. Кеше алғашқы спаррингін өткізді. Жаттықтырушысының көңілінен толықтай шықты. Енді шаршы алаңдағы нағыз айқас қажет. Сол үшін уақыт жоғалтпай, екі аптадан кейін, яғни 4 наурыз күні Мәскеуде кезекті жекпе-жегін өткізеді», – деді Завилейский. Фируза Шәріпова қазіргі уақытта Мәскеудегі «Бокс академиясында» титулды ұрысына дайындалып жүр. Мәліметтер бойынша бапкері Сергей Кубышев оған техникалық тұрғыдан жаңа бағыттарды үйретіп жатыр. Ал ертең өзі жаттығып жүрген академияда шеберлік сабағын өткізеді. Айта кетейік, кәсіпқой боксшы қыздың титулды жекпе-жегі EXPO-2017 кезінде ұйымдастырылатын бокс кешінде өтуі мүмкін.