Бала көзіндегі бақыт

Ала жаздай асыр салып ойнаған балаларды жаңа оқу жақындағанда қуантқанға не жетсін! Әсіресе, мек­теп табалдырығын енді ат­тайтын балдырғанның оқу құ­ралдары мен арқаға асатын сөмкелерді көргенде күлімдеген көз­дерінен нұр төгіліп-ақ тұрады. Атыраудағы №34 лингвистік гим­назияның бірінші сыныбына қабылданған 100 бала дәл осындай көл-көсір қуанышқа кенелді. Оларға «Норт Каспиан Оперейтинг Компани Н.В.» (НКОК) компаниясы «Мектепке жол» акциясы аясында оқу құрал­дарымен толтырылған сөмкелер сыйға тартты. Аталған компания сонымен бірге, Мақат ауданындағы аз қамтылған отбасылардың балаларын да қуантуды ұмытқан жоқ. Аудан орталығындағы мәдениет үйіне жиналған 100 балаға мектеп құралдары мен сөмкелерді тарту еткен «НКОК» компаниясы әлеуметтік, корпоративтік және экологиялық міндеттемелерін жауапкершілікпен атқаруда. Компанияның жүзеге асырып жатқан әлемдік деңгейдегі жобасы Атырау мен Маңғыстау облыстары тұрғындарының, сонымен бірге, тұтастай ел игілігіне жұмыс істемек. «Консорциум жыл сайын балалар өмірін жақ­сартуға бағытталған түрлі шараларды өткізуге де атсалысуда. Соның ішінде, «Мектепке жол» акциясы шеңберінде балаларға оқу құралдарын сыйға тартуды көздедік. Біз балалардың мектепте жақсы оқуына тілектеспіз», деді «НКОК» компаниясының қоғаммен қарым-қатынас орнату жөніндегі кеңесшісі Альбина Мұхамбетова. «Берсең – балаға бер» дегендей, олардың қуанғанына, күлімдеген көзі бақыттың нұрына толғанына ештеңе жетпейді. Жолдасбек ШӨПЕҒҰЛ, «Егемен Қазақстан» Атырау облысы