Ақпарат құралдары мен байланыс саласының үздіктері марапатталды

Кеше Байланыс және ақ­парат қызметкерлерінің күні ме­рекесіне орай «Қаз­Медиа орта­лығында» салта­натты іс-шара өтті. Онда Ақ­парат және ком­муни­­ка­ция­лар министрі Дәурен Абаев журналистер мен бай­ла­ныс саласының қыз­меткер­­лерін кәсіби мереке­сімен құт­тықтап, олардың бір то­бын «Үздік байланысшы» және «Ақпарат саласының үзді­гі» төсбелгілерімен мара­пат­тады. Мерекеде ең алдымен Премьер-Министрдің орынбасары Дариға Назарбаеваның БАҚ өкілдеріне жолдаған құттықтау хаты оқылды. Онда: «Құрметті БАҚ өкілдері мен бай­ланыс саласы­ның қызметкерлері, Сіздерді бүгінгі кәсіби төл мере­келеріңізбен шын жүректен құт­тық­таймын. Тәуел­сіздіктің 25 жы­лында еліміздегі ақпарат саласы жаңа белестерді бағындырып, жедел хабар таратуда үздік келеді. Қазіргі технологиясы дамыған заманда қоғамға білікті мамандар қажет. Кез келген жаңа­лықты дер уақытында ха­лық­қа жеткізіп, өз аудиториясына шы­найы ақпарат беру әрбір БАҚ ұжымының міндеті. Осы орайда, мен сіздерге шығармашылық та­быс, отба­сы­ларыңызға тек жақ­сы­лық тілей­мін» – деген ізгі лебіздер бар. Мұнан соң министр Дәурен Абаев қос саланың қызметкерлеріне шы­найы құттықтауын жеткізді. – Құрметті әріптестер, қым­батты достар, баршаңызды Бай­ланыс және ақпарат қызметкерлері күнімен шын жүректен құттық­таймын. Мемлекет басшысы айт­қандай, ХХІ ғасырда ақпарат сала­сы оқиғаларды таратушы ғана емес, тұтас әлемде оның қалай өріс­теп отырғанын айшықтайтын же­текші күшке айналды. Әлемде бұрын-соңды болмаған үрдістер жүзеге асып, байланыс пен ақпа­рат қоғамның бар саласына қалай ықпал етіп жатқанын көріп жүрсіздер. Осынау жаһандық тренд аясында Қазақстанның осы салалары қар­қын­ды дамып келеді. Ақпарат және ком­муникациялар министрлігі үшін бүгінгідей қым-қуыт заманда өз­деріңіз сияқ­ты майталман мамандармен тығыз қарым-қаты­наста бірге болу өте маңызды, – деді министр. Сонымен қатар, ол журналистиканың қазанын­да қайнап, байланыс саласының басы-қасында жүріп үздік атанған бір топ қызметкерді марапатта­ды. Оларға министрліктің төсбелгілері мен Құрмет грамотасы табысталды. Мұнан кейін салтанатты шара­ға арнайы келген Парламент депу­таттары да БАҚ өкілдерін құттықтап, ақ тілектерін жеткізді. Ал мерекелік шара соңы концерттік бағдарламаға ұласты. Талғат РАЙЫМБЕК, «Егемен Қазақстан»