Кеше найзағайдай намысты жырларымен оқырман көкірегіне от жаққан шайырын қазақ жұрты жер бесікке арулап қойды. Алатау ғана ма күңіренген? Алматы аңыраса, Түркістан қабырғасынан қаусағандай, Атырау мен Алтай арасы қайғырып, Арқа мен Жетісу жұрты аза тұтып, ақынын жоқтап қалды. Мемлекеттік сыйлықтың лауреаты, Қазақстанның халық жазушысы, ақын Темірхан Медетбектің дүниеден өткені ұлт руханиятының орны толмас қазасына айналды.
Темірхан ақын туралы тебіренбей сөйлемеу мүмкін емес. Есімі аталса, көк түріктер сарыны бірге оянады. Аттан түсіп қалғандай қазақ баласына күн түбінен көк түріктер рухын ала келген шайыр тәуелсіздік таңы атқанын ұлт поэзиясында тегеурінді жырлары арқылы танытты. Сөз танығандар Тоныкөк пен Темірхан егіз деп жазды. Ақын тәуелсіздік жылдарының басында «Көк түріктер сарыны» жырларын тудырғанға дейін де қазақ өлеңінің шоқтығы биік өкілі ретінде бағаланды. Өлең өлкесіне оқшау біткен жартастай ордалы рух көтеріп кірген оғлан «Жұмыс киімін» жамылып, «Ұста дүкенінде» көрікте балқыған темірді төс үстінде найзағайдай аунақшытып, қалай болсын солай игені жырсүйер қауым жадында. «Жанымның жапырақтары» атты алғашқы жинағынан бастап өле-өлгенше қазақ рухына қызмет еткен рух жаршысы Халық жазушысына айналғаны тектен тек емес.
1945 жылы Түркістан облысында туған ақын Шерхан Мұртаза басшылық еткен тұста «Егемен Қазақстан» газетінің Маңғыстау облысындағы тілшісі қызметін атқарып, намысқа суарылған жырлары арқылы ұлттық рухтың алауын жақты. «Сапар алдында», «Алыс шақырымдар», «Мәртебе», «Әуедегі толқындар», «Дауыс», «Көгершін қауырсындары», «Аңқа кептірген аңызақ», «Сырым бар саған айтатын», «Тағдырлы жылдар жырлары», «Көк түріктер сарыны», ІІІ томдық «Таңдамалы жыр жинағы» секілді жыр жинақтарының, «Менің Абайым», «Баба дәстүрдің мұрагері кім?», «Сегіз қырлы сексен сырлы әлем бұл» атты сын кітаптары, «Толғауы тоқсан дүние» атты публицистикалық ой-толғаулар мен эсселер кітабының авторы қазақ халқымен мәңгі жасай берері сөзсіз.
«Egemen Qazaqstan» қаламгерлері