Заң үстемдігі қағидатын нығайту және әйелдер мен балаларды заңнамалық қорғау – реформаның әрі мемлекет саясатының маңызды бағыттарының бірі. Мемлекет басшысы осы бағытқа, яғни бала құқықтарына барынша назар аударып келеді.
Осылайша, бірнеше жылдың ішінде Президент бастамасымен балаларға арналған бірқатар реформалық өзгерістер, заңдар, бағдарламалар қабылданды. Мысал ретінде «Ұлттық қор балаларға» бағдарламасын, «Жайлы мектеп» жобасын, «Қазақстан халқына» қорының 67 әлеуметтік маңызы бар жобаларын айта аламыз. Бірнеше жылдың ішінде «Қазақстан халқына», «Самұрық-Қазынаның» қамқорлық қорлары 52 оңалту орталығын ашты. Сонымен қатар әйелдер мен балалар құқықтарына қатысты заң қабылданды. Заңдағы түзетулердің 60 пайызы балаларға бағытталған.
Екіншіден, қамқоршылық қызметтеріне қатысты заңға да өзгертулер мен түзетулер енгізілді. Егер әйелдер мен балалар құқықтарын қорғауға, қауіпсіздігін қамтамасыз етуге қатысты заңның беріп жатқан нәтижесіне көз жүгіртсек, заңның қабылданғанына да көп бола қоймағанына қарамастан, бірқатар оң өзгерісті атап өтуге болады. Мәселен, ел аумағында қазірдің өзінде 87 отбасын қолдау орталығы ашылды. Оларға балалар құқықтарының бұзылуының алдын алуда, отбасыларға әлеуметтік, заңдық, психологиялық қолдау көрсетуде өте маңызды міндеттер жүктелген. Жалпы, тағы да осындай 125 орталық ашу бағытында жұмыстар қолға алынды. Мұның түпкі мақсаты – қысымға ұшыраған, көмекке мұқтаж барлық отбасыны қолдау шараларымен толық қамту. Яғни қолдауға зәру отбасылардың ешқайсысы мемлекет ұсынып жатқан жобалардан, бағдарламалардан тыс қалмауы керек.
Проблемалық отбасыларды бақылау мақсатында 45 мың рейд ұйымдастырылды. Барлық облыста психологиялық қолдау орталықтары ашылды. Жақында балалардың құқықтарын қорғау бөлімдері де ашылмақ.
Сондай-ақ ЮНИСЕФ-те Қазақстанның балаларды қорғау жөніндегі жұмыстарын жоғары бағалап отыр.
Динара ЗӘКИЕВА,
Бала құқықтары жөніндегі уәкіл