Кеше Қазақстан Республикасы Сыртқы істер министрлігінің Ерекше тапсырмалар жөніндегі елшісі Мәдина Жарбосынованың төрайымдығымен еліміздің сыртқы саясат ведомствосы жанындағы Еуропадағы қауіпсіздік және ынтымақтастық ұйымының Адам өлшемдері жөніндегі консультативтік кеңесінің бірінші отырысы болып өтті.
Консультативтік кеңестің басты мақсаты Қазақстан Республикасының 2010 жылдағы төрағалығы барысында адам өлшемдері жөніндегі мәселелерді талқыға салу болып табылады. Осы жөнінде Ерекше тапсырмалар жөніндегі елші, ЕҚЫҰ департаментінің директоры Сержан Әбдікәрімов былай деді: “Қазақстан ЕҚЫҰ төрағасы ретінде гуманитарлық, сондай-ақ біздің Ұйымымыздың барлық үш өлшемдерін теңдей толтыру шеңберінде өзінің әлеуетін толық пайдалануға ұмтылатын болады”. Қоғамдық өмірдің ерекше маңызды аспектілерін қамтығандықтан, гуманитарлық өлшемдер мәселелеріне үкіметтік емес ұйымдар, азаматтық қоғам мен жалпы қоғам тарапынан айтарлықтай көңіл бөлінуде. Консультативтік кеңестің құрылуы еліміздің халықаралық сарапшылар қоғамдастығымен және азаматтық қоғам институттарымен ашық үнқатысуға үлкен маңыз беріп отырғандығын көрсетеді.
Кеңес құрамына мемлекеттік органдар өкілдері, “Бас редакторлар клубы” ҚҰ, “Әділ сөз” сөз бостандығын қорғау қоры, Алматыдағы Хельсинки комитеті, “Адам құқы үшін хартиясы” қоғамдық қоры сияқты қазақстандық үкіметтік емес ұйымдар, сондай-ақ гуманитарлық себет мәселелеріне маманданып жүрген Германия, Эстония, Нидерланды, АҚШ, Ұлыбританияның халықаралық сарапшылары кірген. Кеңес мүшелерінің алдында жоспарланып қойылған гуманитарлық өлшемдерге арналған іс-шаралар өткізу және ЕҚЫҰ-дағы қазақстандық төрағалықтың басымдықтары мәселелерін талқылау міндеті тұрды.
Бірінші қосымша кеңес “Гендерлік тепе-теңдікті алға жылжыту мен саяси және қоғамдық өмірге әйелдердің қатысуы” деп аталады. Екінші қосымша кеңес “Азшылық ұлтқа жататын тұлғаларды оқыту: интеграция және теңдей мүмкіндіктер”, сондай-ақ үшінші қосымша кеңес “Дін және ар-ұждан еркіндігі” деп бекітіліпті. Бұдан басқа “Сот жүйесі тәуелсіздігін нығайту және қоғамдастықтың сот әділдігіне қолжетімділігі” атты семинар өткізу жоспарланған екен. Гуманитарлық өлшемдер аумағындағы міндеттерді орындау жөніндегі кеңес өткізу де назардан тыс қалмаған. Әсіресе, Копенгаген құжатының қабылдануына 20 жыл толуына орай конференция мен Кемсітушілікті болдырмау және толеранттылық жөніндегі жоғары деңгейлі конференция өткізу басты міндеттердің біріне айналып отыр.
Сонымен қатар Консультативтік кеңес шеңберінде БҰҰ Адам құқықтары жөніндегі кеңесінің 2010 жылға арналған әмбебап мерзімдік шолуы барысында Қазақстан тарапына ұсынылған 26 ұсыныс, соның ішінде ұлттық баяндама да қаралатын болады.
Асқар ТҰРАПБАЙҰЛЫ.