Шығыс Қазақстан облысы Өскемен қаласының сол жағалауын дамытуға басымдық берілді. Бұл туралы YK-news.kz хабарлады.
Бас жоспар бойынша 20 жыл ішінде сол жағалауда көпқабатты автотұрақ, мектептер, спорт алаңы мен ауруханалар бой көтереді. Осының бәрі 19-ші шағын ауданға шоғырланады. «Қазір біз сол жағалаудан орын алатын нысандардың инженерлік инфрақұрылымын пысықтау үстіндеміз. Соның ішінде сапалы жол салу мәселесі де тұр. Жоспар бойынша осы аумақта бірнеше нысандардың қатарында 4 мектеп пен 9 балалар бақшасы салынады»,- дейді Өскемен қалалық сәулет және құрылыс бөлімі бастығының орынбасары Дәурен Қасымов.
Бас жоспарда көрсетілгендей, жоғарыда аталған шағын ауданда жалпы 130-ден аса ғимарат салынады екен. Солардың арасында қалалық әкімдік, облыстық прокуратура мен облыстық сот, кинотеатр бой көтереді. Ал қала тұрғындарының қолайлы дем алуы үшін үлкен саябақтың аумағы жасыл-желекпен көмкеріледі.
Данияр Түймебай.