Колумбияда зика безгегін жұқтырғандар саны артып барады

АСТАНА. 28 ақпан. Колумбияда зика безгегін жұқтырғандар саны артып барады. Бұл туралы РИА «Новости» ақпарат агенттігіне сілтеме жасаған egemen.kz тілшісі хабарлады. Соңғы бір аптаның ішінде зика індетін жұқтырғандар саны 37 мыңнан 42,7 мыңға артты. Олардың арасында 7,6 мың тұрғын жүкті әйелдер. Осы көрсеткіш бойынша, Колумбия Бразилиядан кейінгі екінші орында тұр. Аталған індетке шалдыққандар саны көп болғанымен микроцефалиямен туылған бір-ақ бала анықталды. Сондай-ақ, осыған дейін зикамен ауырған гийена-барре синдромы бар үш науқас көз жұмды. Дәрігерлер олардың қайтыс болуына осы синдром себеп болды деген шешім шығарды. Зика індеті көбіне қауіпті вирус жұқтырған жәндіктер мен торпикалық аймақтарда өмір сүретін масалар арқылы жұғады. Адамдар арасындағы жұқпалы аурулардың қатарына жатпайды. Дене қызуы, тітіркенуі, буын арасындағы жайсыздық, бас аурулары індеттің негізгі белгілері болып есептеледі. Зика індетін жұқтырған болашақ анадан микроцефалия ауруымен ауыратын сәбилер дүниеге келеді. Ол өз кезегінде сәбидің бас сүйегінің қажетті мөлшерде өсуіне кедергі жасап, ми құрылысының дамуына зиянын тигізеді. Бұл кезде арнайы вакциналар көмектеспейді. Дүниежүзілік денсаулық сақтау ұйымы қауіпті індеттің 2015 жылы сәуір айында Бразилия мемлекетінде басталғанын ресми түрде хабарлады. Осыдан соң, Оңтүстік Американың өзге де елдеріне тараған. Аян Әбдуәли. Дерек, сурет: РИА «Новости».