Ауылдың қаладағы жаңғырығы

«Ауыл» халықтық-демократиялық пат­риот­тық партиясының Алматыдағы штабында сайлаушылар Парламент Мәжілісі депутаттығына кандидатпен кездесті. Салтанатты іс-шара алдында еліміздің Әнұраны орындалды. – Біздің алматылық партия мүшелері елі­міздің өзге аумақтарындағы секілді сайлау науқанына жан-жақты дайын­дық­пен келді. Партия өзі тарапынан жаңадан сайланатын Парламентке 19 үміткердің есімін атаған болатын, – деді сайлаушылар алдында сөз сөйлеген «Ауыл» ХДПП-ның Алматыдағы филиалының директоры Абдолла Сапаров. – Бүгін сіз­дер біздің Алматыдағы бас штабта алғашқы үміткерімізбен кездесіп отырсыздар. Үміткердің аты-жөні – Дәурен Әділ­мыр­заұлы Маралов, «Алтын диір­мен» корпорациясы директорлар кеңесі­нің төрағасы. Халықаралық дәрежедегі экономист маман. Сайлаушылармен жүздесу барсында үміткер өзі және бола­шақ жоспары туралы, сондай-ақ, әлеуметтік мәселелерге байланысты қойылған сауалдарға жан-жақты жа­уап берді. – Сіз не үшін сайлауға түсуге бекін­діңіз? – Сайлау ең алдымен кез келген елі­міз­дің азаматының, яғни үміткердің мүм­кіндігін, саяси әлеуетін сынайтын емти­хан. Адамның қоғамға қаншалықты қажет екендігінің анық көрсеткіші. – Кімге арқа сүйейсіз? – Ең алдымен – ауыл халқына. Рес­пуб­лика тұрғындарының 45 пайызы ауылда тұрады. Олардың барлығы да «Алтын диірменнің» нанынан ауыз ти­гендер. Сол секілді өзім басқарып отыр­ғ­ан 2000 адамдық ұжымды да сайлау алдындағы үлкен де қуатты күш санай­мын. Парламент Мәжілісінің депу­тат­тығына кандидат Дәурен Маралов сайлаушыларға еліміздегі заң шыға­рушы жоғарғы органның тыныс-тіршілігінен жақсы хабардар екені туралы да нанымды әңгіме айтып берді. Сол себепті де алғаш ұсыныс түскен кезде көп ойланбастан сайлау науқанына қатысуға тас түйін дайын болған. Үлкен өндірістің жас басшысы саяси үлкен науқанда Парламент мінберіне қол жеткізсе, Қазақстанның болашағы – қоғамдық дамудың жаңа сатысын жаңғырту жас ұрпақтың қолында екенін дәлелдемек. Жиында ел мен жер, ана мен бала, ауыл шаруашылығы өнімдері мен нан тағамдары, жел мен су, тіпті, топырақ эрозиясына дейін әңгіме көтерілді. Сайлаушылардың көкейін мазалаған барлық сұраққа Дәурен Маралов тұшымды жауап қайтарды. Алғашқы тұлпарын үлкен додаға желпіндіріп қосқан ауылдықтар салтанатты шараны «Атамекен» әнін орындап аяқтады. Талғат СҮЙІНБАЙ, «Егемен Қазақстан». АЛМАТЫ.