Жақсы маман қашанда құрметке ие

Кеше «Бірлік» саяси партиясының төрағасы Серік Сұл­тан­ғали, партия төрағасының орынбасары Бауыр­жан Бөрі­бек және «Бірлік» партиясы ОҚО филиалының төра­ғасы Самат Қарабаев Оңтүстік Қазақстан поли­тех­ни­калық колледжі студенттерімен кездесті. – Мен өзім 16-17 жасымда ауылдан қалаға келгенмін, – деді Серік Сұл­танғалиұлы. – Бар арманым Ал­маты­ға орнығып, үй-жай алу, орнықты жұ­мы­с орнын табу еді. Бұл мақсатыма жет­тім. Сендер ғажап кезеңде өмір сүріп жа­тырсыңдар. Бодандық қамытын киіп, өзгеге жаутаңдаған елде емес, Тәуел­сіздігінің күні жарқыраған, арман-мақсаты асқақ Қазақстанның ұрпа­ғы­сыңдар. Сендерді үлкен мүмкіндіктер күтіп тұр. Осылай деп сөз саптаған партия серкесі «Бірліктің» мақсат-мұратынан ой­ларын таратты. Оның айтуынша, әлемдік дағдарыс басқа да мемлекет­тер сияқты Қазақстанға да әсерін тигізіп жатыр. Осындай жағдайда күйзелудің, уайымға берілудің жөні жоқ. Әрбір отбасының Алла тағала берген өз несібесі бар. Осыған дейін қазақ отбасылары бала-шағасын жоғары оқу орындарында оқытуға мән беріп келді. Өзінің жаны қаламаған, ата-анасының қалауымен мамандық алған жастар қолында дипломы болса да жұмыс таба алмай, іліккен жұмысты істеп жүр. Келесі кезекте ол қазақ жастарының жалған намысты қойып, кәсіптік-тех­никалық мамандықтарды меңгеруі керек екенін атап көрсетті. «Мен ұзақ жыл газ саласында басшылық қызметте болдым. Сонда байқағаным, жоғары дәрежелі ең жас токарьдың жасы алпыс­та еді. Яғни, талапты жасқа жұмыс көп. Елбасымыз 2017 жылдан бастап кәсіптік-техникалық мамандықтарға тегін оқыту мәселесін Үкіметке тапсырды. Осы мүмкіндікті құр жіберіп алмаңыздар», – деді «Бірлік» партиясының көшбасшысы Серік Сұлтанғалиұлы. «Бірлік» саяси партиясының бір ұстанымы – жастарға бүгінгі өмірге қат мамандықтарды меңгертуге көмектесу болып табылады екен. Мамандық алу – жан бағу ғана емес, өзіңнің орныңды адаспай табудың бірінші қадамы. Жақсы маман қашанда құрметке ие. Кең байтақ Қазақстанда табиғи қазба байлықтары көп. Бірақ мұнайдан түсетін табыстарға тоқмейілсімей, жоғары технология жетістіктерімен жұмыс жасауға бет алу керек. «Бірлік» партиясының төрағасы жас­тарға «кейде миллиардтаған қаржысы бар адамға ақшасы бақыт әкеле алмайтынын атап көрсетті. «Ең үлкен бақыт – отбасың – алтын бесігің, өмірден өз орныңды адаспай табу. Жасампаз Қа­зақ­станның жалынды ұрпағы – сіздерге тілеріміз сол», – деп ойын түйіндеді Серік Сұлтанғалиұлы. Бақтияр ТАЙЖАН, «Егемен Қазақстан». Оңтүстік Қазақстан облысы.