Автомобиль кластері жетекші салаға айналмақ

Соңғы жылдары Қостанайдың өндіріс саласына машина шығару өзенге талмай құяр бұлақ секілді қосылды. Әлемге танымал атақты Ssang Yong, осы марканың қазақстандық NOMAD үлгісін, Toyoto секілді брендтерді құрастырды. Әлемді құрсаған қаржы және саяси дағдарыстарға және Ресейден автокөліктің көптеп кір­гі­зілуіне байланысты өткен жылы Қос­танайда құрастырылған автомобильдерге сұраныстың түсіп кеткені белгілі. Алайда, бұл осы саланы дамытуға көлденең тұрмайды. Инвестициялар және даму ми­нистрі Әсет Исекешев Қостанайға кел­ген са­па­рында Қытай, Франция, Италия инвес­торларымен кеңес өткізді. Жоба­лар бойынша екі және үш жақ­ты меморандумдарға қол қойылды. Келі­сімдер түйінделер алдында AllurGroup директорлар кеңесінің төрағасы Андрей Лаврентьев министрге және шетелдік инвесторларға машина жасау ісінің кеңейтілуіне байланысты қайта жасалған және жаңғыртылған өндірістік алаңды аралатып көрсетті. Осы жерде Peugeot, JAC және IVECO Stralis, Daily ауыр жүк машиналары жасалады. Желіден шыққан автомобильдер көрсетілді. Оның айтуынша, осы іске 2016 жылы 8,6 миллиард теңге инвестиция құйылады, жылына 40 мың автомобиль сапқа қойылмақ. Негізі Қостанайдан өндірілетін машиналар Ресей нарығына бейімделеді. Бірақ Еуразиялық экономикалық одақ елдерінің кеден шарттарына сәйкес экспортталатын тауарлардың 50 пайызы сол елде жасалуы тиіс. Соған орай франциялық, қытайлық машиналарды құрастырғанда олардың 50 пайыз жұмысы тікелей Қостанай машина құрастыру зауыттарында атқарылуы тиіс. Мұны шетелдік инвесторлар құп алды. Осыған орай Қостанайда индус­трия­лық аймақ құрылатын болды. Оның инфрақұрылымдық жұмыстары биыл басталып, келесі жылы аяқталады. Оған барлығы 2 миллиард теңгенің сыртында қаржы бөлінбек. – Индустриялық аймаққа жер бөлу, оған газ, су, жолдар, теміржол тарту секілді инфрақұрылымдық жұмыстардың барлығы облыс еншісінде. Мұның құжаттары дайындалу үстінде, биыл жұмысты бастаймыз, – деді облыс әкімі Архимед Мұхамбетов. Инвесторлармен кездесу соңында аталған мәселелер бойынша келісімдерге қол қойылды. Нәзира ЖӘРІМБЕТОВА, «Егемен Қазақстан». ҚОСТАНАЙ.