Кеншілер құтқарылды
Өткен аптадағы ең айтулы оқиғаның бірі Чилидегі жер астында қалған кеншілерді шығарып алу болды. Мұны кеншілердің қиын жағдайдағы қаһармандық ерлігі деумен бірге, құтқарушылардың қамқорлығының өнегесі деуге де болады.
Осыдан екі айдан аса бұрын Сан-Хосе шахтасында 33 кенші шығар жолдың бітелуінен 700 метр тереңдікте қалып қойған еді. Тар ұңғыма арқылы оларға азық-түлік, су және дәрі жеткізіліп тұрды. Енді, міне, сол ұңғыманы біршама кеңейтіп, арнайы капсула арқылы оларды бір-бірлеп шығарып алуға мүмкіндік туды.
Таңдау – Собянин
Мәскеу мэрін таңдау ресейліктер үшін айтарлықтай маңызды саяси оқиға болып отыр. Парламенттегі жетекші “Единая Россия” партиясы президент Дмитрий Медведевке төрт адамды: Нижегород облысының губернаторы Валерий Шанцевті, вице-премьер Сергей Собянинді, көлік министрі Валерий Левитинді және Мәскеу мэрінің бірінші орынбасары Людмила Швецованы ұсынып еді. Президент солардың арасынан Собянинге тоқтады. Мәсдуманың оны қолдайтыны даусыз.
Ең ірі қуат тұтынушы
Аптаның аяғында Парижде 28 ірі елдің басын біріктіріп отырған Халықаралық қуат агенттігінің екі күндік саммиті өтті. Сонда агенттік директоры Набуо Танакудың мәлімдеуінше, қуатты пайдалану жөнінде Қытай бірінші орынға шығыпты.
Бүкіл әлемде өндірілетін мұнайдың жартысына жуығын Қытай пайдаланатын көрінеді.
Чавес – Ресейде
Венесуэла президенті Уго Чавес ресми сапармен Мәскеуге келді. Оны сырнайлатып, кернейлетіп қарсы алды. Ол ел басшылығымен, президент Дмитрий Медведевпен кездесіп, келіссөз жүргізген.
Ең бастысы – Ресей бұл елге АЭС салып бермек. Сондай-ақ Ресейден қару алуға, мұнай кен орындарын зерттеуге, ортақ банк ашуға келіскен көрінеді.
“Темір леди” — 85 жаста
Жиырмасыншы ғасырдағы ең атақты тұлғаның бірі, қасиет-келбетіне қарай “Темір леди” атанған Маргарет Тэтчер 85 жылдығын атап өтті. Осынау қайсар қайраткердің таңданарлық ісі көп. Ол қатарынан үш мерзім Ұлыбритания үкіметін басқарды. Мұндай оқиға бұған дейін 180 жыл бұрын болған екен.
Жұрт оның өмірін еліне, халқына қызмет етудің өнегесі санайды.
Зейнеткерлік үшін күрес
Француздар зейнеткерлікке ерте шығып, еркін демалғанды қалайды. Олар үкіметтің зейнеткерлік жасты өсірмек болғанына қарсылық акциясын тағы да жалғастырды. Ереуілге бұл жолы 3 миллион адам шығып, біраз саланың жұмысы тоқтап қалды. Бұл ел экономикасына айтарлықтай әсер етпек.
Соны ескеріп, жұртшылық арасында бұл акцияны айыптаушылар да бар.
“Көжеден құрт шықты”
Тверь облысының губернаторы Дмитрий Зеленин ФРГ президенті Кристиан Вульфтың құрметіне Кремльде берілген қонақасы кезінде өзіне салып алған салат ішінен тірі жауын құрты шыққанын хабарлады. Және оны суретке түсіріп алған көрінеді.
Президент іс басқармасы губернатор бұл сөзін дәлелдей алмаса, жаза алатынын айтты. Дәлелдесе де, бұл Ресей үшін масқаралық. Дәлелдей алмас. “Потемкин” кемесінің матростары “көжеден құрт шыққанда” көтеріліс жасағаны белгілі. Сірә, Зеленинді жаза күтіп тұрғандай.
Орысшадан – ағылшынға
Грузия мектептерінде орыс тілінің орнына ағылшын тілі міндетті пәнге айналды. Ал орыс тілін қаласаң ғана оқисың.
Қазір мектептерде 5 пен 16 жас орталығындағы балалардың ағылшын тілін білуі мақсат ретінде қойылып отыр. Мұны батысқа бағыт ұстаған ел басшылары уақыт талабы санайды.
Әзірлеген Мамадияр ЖАҚЫП.