«Тайқазан» эстафетасы – ақтөбеліктерде

Орал қаласындағы Салтанат сарайында «Қазақстан халқы Ассамблеясы – 20 ізгі іс» республикалық «Тайқазан» эстафетасын Ақтөбе облысына салтанатты түрде табыстау рәсімі болып өтті. Шараға Батыс Қазақстан облысы ҚХА өкілдері мен этномәдени бірлестіктер, Дос­тық клубының мүшелері, орта және жоғары оқу орындарының сту­дент­тері қатысты. Түркістан қаласынан бастау алған республикалық эстафета жуырда Атырау облысынан Ақжайық өңіріне келіп жеткен еді. – Береке мен тоқшылықтың символына айналған қасиетті Тайқазан еліміздегі көптеген облыс орталықтарын аралап өтіп, біздің өңірімізге де келіп жетті. Бүгінгі шараның басты мақсаты – ел ішінде атқарылып жатқан жақсы істердің тізімін Тайқазанға салып, оны Ақтөбе облысына табыстау. Еліміздегі барлық облыс­тарды аралап, сәуірдің 22-сі күні Астана қаласына жеткізілетін ізгі істерге толы Тайқазан ҚХА-ның кезекті сессиясында Ассамблея Төрағасы Нұрсұлтан Назарбаевқа табысталмақ, – деді салтанатты шарада құттықтау сөз алған Батыс Қазақстан облысы ҚХА төр­ағасының орынбасары, хатшылық меңгерушісі Ғайса Қапақов. – Құрметті батысқа­зақ­стан­дықтар, Қазақстан халқы Ас­сам­блеясының 20 жылдығына бай­ланысты бүгінгі акцияға біз­дің облыстағы 19 этномәдени бір­лес­тіктің де қосар үлесі мол бол­мақ. Олардың әрқайсысы бү­гінде түрлі ізгілікті істермен айналысуда. Біз де өз кезегімізде қазақ үшін бірліктің тірегі, халық тоқшылығының белгісі болған киелі Тайқазанды Қостанай облысына аттандырмақпыз. Татулық пен келісім салтанат құрған Қа­зақ елінің ізгілікті істері молая берсін, – деді «Қазақстан хал­қы Ассамблеясы – 20 ізгі іс» рес­пуб­ликалық «Тайқазан» эстафетасын салтанатты түрде қабылдап алған Ақтөбе облысы Қазақстан халқы Ассамблеясының хатшылық меңгерушісі Жолдас Нұршин. Салтанатты жиында «Қа­зақ­стан халқы Ассамблеясы – 20 ізгі іс» аясында Ассамблеяның жекелеген өкілдерінен құрал­ған, «ҚАЗИИТУ» ғылыми-бі­лім кеше­нінің президенті, облыс­тық мәс­лихаттың депутаты Ақ­серік Әй­тімов төрағалық ететін «Мейірім шуағы» еріктілер қозға­лысының тұсаукесер рәсімі жасалды. Шара барысында облыстық есту және сөйлеу қабілеті бұзылған балаларға арналған мектеп-интернат кешенінің, сондай-ақ, «Яик» фольклорлы этнографиялық және Жастар шығармашылығы орталықтарының, «Ақжайық» би ансамблінің өнер­паздары жұртшылыққа мерекелік көңіл-күй сыйлады. Нұртас САФУЛЛИН, журналист, Темір ҚҰСАЙЫН, «Егемен Қазақстан». ОРАЛ. Суретті түсірген Темірболат ТОҚМАМБЕТОВ.