Құдық түбіндегі бір қап снаряд

Қарағанды облысындағы Пришах­тинск елді мекенінде тұратын Сұлтанбек есімді бозбала құдықтың түбінде жатқан бір қап снарядты тауып алды. Не істерін білмеген жас жігіт оны суретке түсіріп, ғаламторға салған. «Мұн­дай жағдайда не істеу керек?», – деп жерлестерінен ақыл-кеңес сұраған түрі ғой. Ол ол ма, бұдан кейін Сұлтанбек құдықтың ішіндегі әлгі снарядтарды сыртқа шығарып, үйіне алып келген. Анасы ұрсып, алған жеріңе апарып таста деген соң, снарядтарды үйдің жанына қоя салыпты. Түні бойы сол жерде жатқан жойқын оқтың екеуін белгісіз біреулер ұрлап та кетіпті. Ғаламторға суреттер жарқ етіп жарияланысымен құтқарушылар мен өрт сөндірушілер және полиция қызметкерлері Рудничная көшесіне жедел жетіп, Сұлтанбектің үйінің маңын тірі жан өтпестей қоршап тастаған. Содан, саперлер келіп, зеңбіректің оғын зиян келтірмейтіндей еткеннен кейін ғана көше күнделікті кейпіне енеді. Шынында да, қап ішіндегі бес сна­рядтың кез келген уақытта жарылып кетуі ғажап емес еді... Қайрат ӘБІЛДИНОВ, «Егемен Қазақстан». ҚАРАҒАНДЫ.