Көкшетауда ат спортынан республикалық жарыс өтуде

КӨКШЕТАУ. 17 тамыз. Көкшетау қаласының іргесіндегі Красный яр ипподромында Кеңес Одағының Батыры, академик Мәлік Ғабдуллиннің 100 жылдығына арналған ұлттық ат спортынан республикалық чемпионаттың ашылу рәсімі өтті. Бұл туралы egemen.kz тілшісі хабарлады. Додалы жарысқа еліміздің 15 облысынан таңдаулы спортшылар қатысып, көкпар, аударыспақ, теңге алу және жамбы ату сайыстарында бақ сынайды. Қазақстан Республикасындағы мемлекеттік денешынықтыру және спорт бағдарламасын жүзеге асыру, спорттың ұлттық түрлерін насихаттауды мақсат ететін жарысқа қатысушылар мен жанкүйер қауымды Мәлік Ғабдуллиннің қызы Майдан Үсенова, Мәдениет және спорт министрлігінің басқарма басшысы Бекболат Байжанов, Ұлттық спорт түрлері ассоциациясының бірінші вице-президенті Бекболат Тілеухан, Ақмола облысы әкімінің орынбасары Дәурен Әділбеков құттықтады. Әйгілі Құлагерімен аңызға айналған Көкше жұртшылығы төрт күн бойы делебе қоздырар қызу жарыстарды төрт күн бойы тамашалайтын болады. Бақберген Амалбек. Дерек, сурет: egemen.kz