Фото: Ашық дереккөз
Жаңа мектептерде бүгінде 200 мыңнан астам оқушы білім алып жатыр, ал сабақ үдерісін 16 000-нан астам мұғалім заманауи әдістер арқылы жүргізіп отыр. Бұл білім беру сапасын арттыруға және оқу процесін жаңаша ұйымдастыруға мүмкіндік беріп отыр.
Мұғалімдердің кәсіби дамуына да ерекше көңіл бөлініп отыр. Қазіргі таңда 10 000-нан астам педагог жасанды интеллект, цифрлық құралдар, STEM бағыты және жаңа педагогикалық тәсілдер бойынша арнайы курстардан өтті.
Оқыту семинарлары – Зияткерлік мектептер, «Білім-Инновация» лицейлері және «Өрлеу» орталығының базасында ұйымдастырылып келеді. Бұл алаңдар педагогтердің тәжірибе алмасуына және жаңа білім беру әдістерін меңгеруіне жол ашып отыр.
Сонымен қатар мектеп директорларын іріктеу жүйесі де жаңартылды. Басшылық қызметке тәжірибелі педагогтермен қатар «Білім берудегі өзгерістердің 1000 көшбасшысы» жобасының түлектері де тағайындалып жатыр.
Директорлар стратегиялық конференциялар аясында STEM-білім беру моделін меңгеріп, дарынды оқушылардың қабілетін дамыту, кадрлық әлеуетті күшейту және жасанды интеллект негізінде сабақ жоспарлау әдістерін үйреніп жатыр.
Жоба шеңберіндегі бұл бастамалар еліміздегі мектептердің сапасын арттырып, білім беру жүйесін жаңа деңгейге көтеруге бағытталған.
