Еңбектен тапқан бақытын

Тынымсыз еңбектің арқасында абыройға кенелген жан көп. Солардың бірі – С.Сейфуллин атындағы Қазақ агротехникалық университетінің профессоры, экономика ғылымдарының докторы Қарлығаш Әленова. Қайрат пен қажырлылықты өміріне арқау еткен Қарлығаш Төлеубайқызы бар ғұмырын ұрпақ тәрбиелеу ісіне арнап, бір ұйымда тапжылмай қырық жыл абыройлы қызмет етіп келеді. Алдымен кафедра меңгеру­шісі, кейін аға ғылыми қызмет­кер атанып, одан соң докторлық диссертациясын қорғаған Қ.Әлено­ваның ұлағатты ұстаз ретінде жазған ғылыми еңбектерінің құндылығы мен қажеттілігі өз алдына. Студенттердің бірнеше буынын тәрбиелеп ұшырған ол әлі күнге дейін магистранттар мен докторанттарды да білім нәрімен сусындатып келеді. Өмірлік серігімен де осы уни­вер­ситетте танысады. Көкше өңірінде дүниеге келіп, оқу, еңбек жолын Ақмола жерінде өткізген жұбайы Қалымбек Зейнуллин үлкен адамгер­ші­лік иесі, кісілігі мен кішілігі мол, талапты, алдына қойған мақсатына табандылықпен жете білген азамат еді. Қалымбек Шегірұлының алаңдамай ғы­лым­мен айналысуына, факультет деканы лауазымына дейін жоғарылап, абыройлы қызмет атқаруына жұбайының қосқан үлесі қомақты еді. Жүрегінде ізгілік, жүзінде мейі­рім шуағы ұялаған жан­­- дар­­дың отбасын ғалымдар от­­басы деп атау­ға әбден болады. Жол­да­сынан ерте айырылса да, жаққан отын өшірмей, шаңырағын шайқалтпай, балаларын білімді азаматтар етіп тәрбиелеумен бірге, Қарлығаш Төлеубайқызы олардың да ғы­лым жолында жоғары жетіс­тіктерге жетуіне барынша ық­пал етті. Бүгінде қызы Римма  Дондағы Ростов қаласында Суслов атындағы Мемлекеттік университеттің философия-экономика факультетін үздік бітіріп, Мәскеу қаласында Ломоносов атындағы мемле­кет­тік университетте аспирантураны тәмамдап, кандидат­тық, кейін докторлық диссер­тация­сын қорғаса, оның жұбайы, яғни күйеу баласы Ғани Са­ғиев Мәскеудің тау-кен институтының аспиран­турасын бітірген, техника ғы­лымдарының кандидаты. Олар­дың қызы Азия мен күйеу баласы Мұрат та жоғары білімді мамандар, ғылыми дәрежелері бар. Ұлы Ғалым Англияда оқыса, кіші қызы Софья – оқу озаты. Үлкен ұлы Руслан – заң магистрі, кеден подполковнигі. Оның үлкен қызы Жанна Л.Н.Гуми­лев атындағы Еуразия ұлттық университетінің саясат­- тану факультетін, кейін магис­тратураны бітірген. Қазір С.Сей­фуллин атындағы Қазақ агротехникалық универ­сите­тінде философия кафедрасында ассистент болып қыз­мет атқарады. Әжесінің әріп­тесі, кіші ұлы Рүстем болса, әке жолын қуған инженер-механик, оның қызы Малика Қытайдың Пекин қаласында оқиды. Осы­лайша, артында саналы ұрпақ пен әдемі өмірдің ізін қалдырған әке есімін бүгінде ұрпақтары жалғастыруда. Өмірлік өлшемдерді мейі­рімділік пен тазалықтан іздей­тін Қарлығаш Төлеубайқызы жан-жақтылығын жұртшылық аузының суы құрып айтады. Ол ән салғанда тамсанбайтындар кемде-кем. Әсіресе, оның дауы­сын жары ерекше ұнататын. Әділ, жасандылықтан ада міне­зімен, дүниетанымының кең­ді­гімен Қ.Әленова бұл тірлікте біраз белестерді бағындырды. Еңбегі де елеусіз-ескерусіз қал­­мады. Жарынан ерте көз жазып қалса да, балаларын жетек­тей жүріп, ғылымнан қол үзбеді. Нәтижесінде, Білім және ғылым министрлігінің «Жоғары оқу орнының үздік оқытушысы» атағы мен мемле­кеттік грантына ие болып, Пекин, Шанхай, Лондон, Нью-Йорк, Хьюстон қалаларына барып, халықаралық «Тем­пус» бағдарламасы аясында Германия, Голландия, Бельгия елдерінде болып, жоғары оқу орындарында тәжірибе ал­масты. Расында да, адам мақсатына өзін-өзі жетілдіру арқылы жетеді екен. Ұдайы ізденіс пен адал еңбектің нәти­жесінде ол өз мақсатына қол жеткізді. Осылайша, тұтастай болмыс-бітімімен, қарым-қабілетімен артына өнегелі із тастап келеді. Ендеше, барға тасымай, жоққа жасымай, арзан атақ қуып алқынып, дүние қуып шалқымаған Қарлығаш Төлеубайқызының өмірі әр­дайым көпке үлгі. Гүлбаршын ӨКЕШҚЫЗЫ, журналист.