Шымкентте футбол академиясы ашылады

АСТАНА. 13 тамыз. Қазақстан футбол федерациясы Оңтүстік Қазақстан облысында футбол академиясын ашуды көздеп отыр. Бұл туралы egemen.kz хабарлады. Өңірде 7 тамыздан бастап Испаниядан келген мамандар жұмыс істеуде. Белгілі футбол клубтарының жаттықтырушылары бүгінде спортқа қабілеті бар балаларды өз командаларына қабылдау үшін іріктеу өткізуде. Үш жас ерекшелігі бойынша өтіп жатқан іріктеу 15 тамызға дейін жалғасады. Шетелден келген бес маман күніне жүзден астам балалардың шеберлігін бағалайды. Испандар әсіресе, жеткіншектердің ойын кезіндегі іс-әрекетіне ерекше мән беруде. Академияға 66 бала қабылданады. Онда шетелдік мамандармен бірге отандық жас жаттықтырушылар да жұмыс істейтін болады. Жас футболшылар БИИК футбол орталығының алаңдарында жаттығады. Әзірге жаңа футбол академиясының республикалық немесе аймақтық болатыны белгісіз. Еламан Қоңыр. Дерек: egemen.kz. Сурет: otyrar.kz.