Халық қалаулысы кәсіпкерлерді жұмылдырып, бір отбасының үйін қайта жөндеп беруге ұйытқы болыпты. Жаңаталаптық ағайындар депутаттың азаматтығына дән риза. А.Зейнетаев сол кезде әлеуметтік желідегі парақшасында: «Осыдан біраз уақыт бұрын Жаңаталап елді мекенінде тілсіз жау екі бірдей отбасының баспанасын шарпыды. Бірінші үй толықтай өртеніп, жанама орналасқан екінші үйдің тек қабырғасы ғана қалған. Бұл жағдай ұзақ жылдар бойы өз күшімен баспана тұрғызған отбасыларға ауыр соққы болды. «Amanat» партиясы Тұран аудандық филиалының төрағасы әрі қалалық мәслихат депутаты ретінде өрттен зардап шеккен екі отбасы мүшелерін қабылдап, оқиға орнына бардым. Жағдаймен жақын танысып, зардап шеккен жандарға моралдық әрі материалдық қолдау көрсету мәселесін талқыладық. Жергілікті тұрғындар өзара ұйымшылдық танытып, бірінші отбасыға көмек жинауды бастап кетіпті. Біз белсенді азаматтармен, кәсіпкерлермен бірлесе отырып, екінші баспананы тұрғызуға атсалысатын болып келістік. Мұндай сәтте елдің бірлігі мен жанашырлығы айқын сезіледі. Бірлігіміз бекем, жүрегіміз мейірімге толы болсын!» деп жазды.
Бүгінде өртке оранған үй ағайын-туыс, Жаңаталап тұрғындары көмегінің арқасында қайта салынып, адамдар тұрып жатыр. Жанында орналасқан көрші баспананың жөндеу жұмыстары бітуге таяу. Үй иесі отбасымен әзірге жақын маңдағы саяжайды паналап отыр.
«Жаңаталап елді мекенінің жаңа құрылыс аумағынан үй салған едім. Өзім жүк көлігін айдаймын. Күздің орта кезі еді. Сыртта көлік жөндеп жатқанмын. Бір кезде үйден өрт шықты. Абырой болғанда келіншегім жұмыста, бала-шағам мектепте еді. Көршілерді шақырып келгенше жалын күшейіп бой алдырмай кетті. Өрт қасымдағы көршімнің де үйін шарпып үлгерді. Әзірге өрттің шығу себебі неден екені белгісіз болып отыр. Жалпы, қауіпсіздік шараларының бәрін жасағанмын. Бұл да бір жазатайым оқиға, басқа түскен сынақ. Халыққа рахмет. Бірден көмек қолдарын созып, қаржылай жәрдемдерін көрсетті. Ағайын-туыс, елдің көмегінің арқасында үйімді қайта тұрғызып, аз уақытта ішіне кіріп алдым. Бірлік болса кез келген қиындықты еңсеруге болады. Соған көзім анық жетті», дейді өрттен зардап шеккен Нышанәлі Зияқұлов.
Өрт шалған үйлерді қайта салып, жөндеуге кәсіпкерлерді жұмылдыруға, қайырымдылық жұмыстарын ұйымдастырып, сол округтен сайланған депутатқа мән-жайды жеткізуге Тұран аудандық әкімдігі де зор көмек көрсетті.
А.Зейнетаев бастаған қайырымды жандар отқа оранған үйдің жанындағы баспананы қайта жөндеуге жәрдемдесіп, біраз құрылыс жұмыстарын атқарып берді. Есік алдын бетонмен тегістеп, үйдің қасбетін тақтатаспен әрледі, шатырын жапты. Енді үйдің ішкі әрлеу жұмыстарын толық жасап беруге уәделесіп отыр. Ішкі құрылыс жұмыстарының бағасы шығарылып, жұмысшылармен арнайы келісім жасалыпты. Жұмыстар көп күттірмей басталады.
Жалпы, халық қалаулыларының қайырымдылық көмектері бір мұнымен шектеліп қалмаған. Шымкент қалалық мәслихатының төрағасы Бахадыр Нарымбетовтің айтуынша, депутаттар бұдан басқа да талай сауапты істерге ұйытқы болып жүр. Олардың бастамасымен әлеуметтік жәрдемге мұқтаж бірнеше отбасы баспаналы болыпты.
ШЫМКЕНТ
