Өзекті мәселелер ескерусіз қалмайды

Кездесу барысында Дания Еспаева өткен жылы Мәжіліс қабылдаған бірқатар заңның мән-маңызын түсіндіріп, былтыр Парламент 100 заң қабыл­дағанын, оның 24-іне депутаттар бастамашылық еткенін атап өтті.

Депутаттар сондай-ақ кездесуге қатысушыларға көлік құралдары иелерінің азаматтық-құқықтық жауапкершілігі мәсе­ле­лері бойынша Мәжіліс баста­машылық еткен заңды таныс­тырды. Мұнда парламент­шілердің бастамалары жол-көлік оқиғалары кезінде жәбір­­ленушілердің өміріне, денсау­лығына немесе мүлкіне залал келген кезде төленуге жататын сақтандыру сомаларын ұлғайтуға бағытталған.

Сондай-ақ депутаттар сақ­тандыру компанияларының өкілдерімен тұрғын үйлерді табиғи апаттардан міндетті сақтандыруды енгізу мәселесін де талқылады.

Мәжіліс депутаты, «Ауыл» партиясы фракциясының мүшесі Жигули Дайрабаев Абай облысына ұйымдастырылған жұмыс сапары барысында аймақ басшысы Берік Уәлимен кездесті. Онда облыс әкімі Мәжіліс депутатына өңірдің қазіргі тыныс-тіршілігін таныстырып, ел игілігі жолында атқарылып жатқан жұмыс жа­йын баяндады.

Сапар аясында Ж.Дайрабаев Семей қаласындағы «Қазтұты­нуо­дағы агробизнес және эко­номика колледжі» ұжымымен кездесу өткізді. Кездесу барысында мәжілісменге колледждің оқу-тәрбие жұмысы туралы ақпарат берілді. Сондай-ақ ол оқу орнын аралап, білім ұясы­ның материалдық-техника­лық базасымен танысты. Сонымен қатар депутат Ж.Дайрабаев студент­тер мен оқытушыларға депу­тат­тық лекция өткізіп, білім саласының өзекті мәселе­лері мен кадр даярлау туралы ой-пікірін ортаға салды.

Мәжіліс депутаты Шәкәрім уни­­верситетінде де кез­десу өткізіп, онда оқу орын­дарының басшыларымен, оқытушы­лар­мен, студенттермен бірге аграрлық білім мен ғылымның өзекті мәселелерін талқылады.

Ал Астанада Мәжілістегі ЖСДП фракциясының мүшесі, депутат Ажар Сағандықова «Астана Эко Полигон» ЖШС-ның жұмысымен танысып, ұжым­мен қатты тұрмыстық қалдық­­тар­­ды басқару жүйесіндегі мәсе­­ле­лер туралы әңгімелесті. Серік­­тес­тіктің бүгінгі ахуалы­мен танысу барысында полигон­ның қалыпты қуатынан шамадан тыс жүктемемен жұмыс істеп жатқаны айтылды. Яғни қолданыстағы екі ұяшық толған ал үшінші ұяшықтың дайын емес­тігі және қалдықтарды сұ­рып­тау деңгейінің өте төмен болуы Астанаға экологиялық қауіп төндіріп тұрғаны белгілі болды.

«Анықталған мәселелер бақы­лауға алынады, сондай-ақ экологиялық заңнаманы жетілдіру бойынша ұсыныстар әзірленеді», деді депутат Ажар Бақытқызы.

«Amanat» партиясы фрак­­ция­сының мүшелері Максим Рожин мен Данияр Қасқарауов Алматы облысы Талғар қаласына барды. Олар қалада 4 жыл бұрын құрылысы қолға алынып, алайда бүгінде тоқтап тұрған магистралдық су таратқыш төңірегіндегі мәселенің мән-жайын білуге тырысты. Талғар қаласына су жеткізетін негізгі жүйе болуға тиіс бұл су таратқыш іске қо­сыл­са, ескі құбырлар мен тозған инфрақұрылымның жүк­те­месі азайып, қала тұрақты әрі жеткілікті көлемде ауызсумен қамтылуы керек-тін. Алайда құрылыс аяқталмағандық­тан, қала әлі де ескі су желісі­не тәуелді. Құрылыстың тоқ­тап қалуына толық қаржы­лан­дырудың жоқтығы себеп болған. Ал қазіргі 4 300 текше метрлік резервуардың сы­йымдылық қуаты қаланы ауыз­сумен толық қамти алмай отыр. 50 мыңға жуық тұрғын­ды ауыз­сумен қамтитын бұл жоба үшін 4,6 млрд теңге қажет. Құрылысты толық аяқтауға қажетті 1,7 млрд теңгеге жуық қаржы әлі бөлінбеген. Оған суды хлорлайтын жабдық­тар, зертханалық құралдар мен негізгі технологиялық құрылғылар алынып, нысан биылғы шілдеде пайдалануға берілуге тиіс екен.

– Дәл осы жабдықтар орнатылмайынша нысанды пайдалануға беру мүмкін емес. Негізгі жабдықтар мен материалдарды биыл сатып алу қажет. Әйтпесе, жобаның құны қымбаттап, іске асыру мерзімі тағы да созылып кетуі мүмкін. Сондықтан облыстық бюджеттен жетіспей тұрған қаражатты уақыт оздырмай бөлу мәселесін көтеріп отырмыз, – деді М.Рожин.

Маңғыстау облысының Мұнайлы ауданында қал­дық­­тарды басқару жүйесіне түсе­тін жүктеменің артуына бай­ланысты проблема туындап отыр. Қайта өңдеу қуаты­ның жетіс­пеуіне байланысты Баян­ды ауылындағы қатты тұр­­мыс­тық қалдықтар полигоны өз аумағындағы ғана емес, Ақтау қаласынан, сондай-ақ Түп­қараған ауданының бірқатар ауыл­дарынан келетін қоқысты қабылдауға мәжбүр. Жағдайды көзбен көріп, нақты шешімдер әзірлеу үшін нысанға Мәжіліс депутаты, «Amanat» партия­сы фракциясының мүшесі Еділ Жаңбыршин барды. Мәжі­ліс­тің Экология мәселелері­нің және табиғатты пайда­лану комитетінің төрағасы мұн­да қолға алынған шаралар­дың мәжбүрлі сипатта екенін және толыққанды қайта өңдеу жүйесін алмастыра алмайтынын атап өтті. Е.Жаңбыршиннің айтуынша, депутаттардың бастамасымен Мәжілісте экология мәселелеріне қатысты түзетулер әзірленіп жатыр.

– Жаңа заң жобасы қалдық­тарды басқару жүйесін жетіл­діруге, қайта өңдеуге арналған экономикалық ынталандыру тетіктерін енгізуге және өтіл төлемдеріне қатысты тәсілдерді қайта қарауға бағытталған, – деді депутат.

Е.Жаңбыршин жергілікті мәслихаттардың төрағалары­мен және депутаттарымен де кезде­сіп, Мәжілісте қабылдан­ған, әзірленіп жатқан, азамат­­тардың өмір сапасын арттыру­ға бағытталған заңдар туралы, сондай-ақ негізгі салалық мәселелер бойынша жүргізілген талдамалық және мониторинг­тік жұмыс­тардың нәтижелері жөнінде кеңінен баяндады.