Ұлттық статистика бюросының дерегінше, өткен айда апельсин бағасы 2,6%-ға, сәбіз – 2%-ға, қант – 1,3%-ға қымбаттады. Ал жұмыртқа бағасы 0,1%-ға төмендеді. Сондай-ақ концентратталған сүт 2,1%-ға, қатты ірімшік 1,8%-ға, көкөніс шырындары 1,6%-ға қымбаттаған.
– Жекелеген дәрі-дәрмектер арзандады. Атап айтқанда, супрастин бағасы 18,5%-ға, энап – 5,2%-ға, канефрон – 1,4%-ға, йодомарин мен азитромицин – әрқайсысы 0,9%-ға төмендеді. Автомобильдер 0,4%-ға, электр құралдары 0,9%-ға арзандады. Ал смартфондар 0,9%-ға, жеке гигиена тауарлары 1,1%-ға қымбаттады.
Коммуналдық қызметтер арасында су бұру тарифтері 2,4%-ға өсті, ал суық су тарифі 0,9%-ға төмендеді. Бір ай ішінде такси қызметтері 1,8%-ға, моншаға бару құны 2,1%-ға, кинотеатр қызметтері 2,9%-ға қымбаттаған, – делінген жазбада.
2025 жылдың қорытындысы бойынша жылдық инфляция 12,3% болды. Желтоқсан айында азық-түлік тауарларының жылдық өсімі 13,5%-ды, азық-түлікке жатпайтын тауарлар 11,1%-ды, ал ақылы қызметтер 12%-ды құрады.
Азық-түлік тауарлары арасында жылдық мәнде қызанақ бағасы 7,9%-ға, күріш – 4,8%-ға, қияр – 4,7%-ға, тәтті бұрыш – 2,7%-ға, кептірілген өрік 2%-ға арзандады. Керісінше, жүзім 7,7%-ға, көк шай 7,9%-ға қымбаттаған.
Азық-түлікке жатпайтын тауарлар арасында аяқ киімге арналған крем бағасы 10,8%-ға, сантехникалық қоспалауыш 8,5%-ға, электр бұрғысы 6,6%-ға өсті.
2025 жыл ішінде тұрғын үй-коммуналдық қызметтер саласында суық су тарифтері 13,1%-ға төмендеді. Ал аяқ киім жөндеу қызметі 10,1%-ға, пошта қызметтері 8,9%-ға, автосақтандыру 6,5%-ға қымбаттады.
Өңірлер арасында жылдық инфляцияның ең төмен деңгейі Алматы қаласында және Қостанай облысында тіркеліп, 11,7% құрады. Сондай-ақ Абай, Жамбыл және Батыс Қазақстан облыстарында инфляция деңгейі 11,8% болды.
2025 жылғы қаңтардан бастап тұтыну бағалары индексін есептеу құрылымында азық-түлік тауарларының үлесі 40%, азық-түлікке жатпайтын тауарлар 30,3%, ақылы қызметтер 29,7% болды. Инфляция деңгейін сипаттайтын тұтыну бағалары индексі ай сайын есептеліп, 508 тауар мен қызмет түрі бойынша жүргізіледі.
