Шығармашылық кештің шымылдығы Гүлзейнеп Сәдірқызының қаламынан туған «Нәлет», «Айбибі», «Әйел жаны», «Қатал үкім» атты отбасылық өмірдің шынайы бет-бейнесін баяндайтын әңгімелер мен повестер желісіне құрылған қысқаша қойылымдармен түрілді. Әр тақырыпқа арқау болған қазақ әйелінің көнбістігі, мейірімділігі мен қатал тағдырға төзімділігін «Сүйінбай» халық театры әртістерінің жанды бейнелеуі, жанарға жас үйірді. Журналистік жолда қиын да күрделі тағдыр иелерімен жүздесіп, олардың тұрмыс-тіршілігін жүрек сүзгісінен өткізген қаламгердің бұл туындылары еш боямасыз шынайы кестеленіп, оқырман жүрегіне жеткені ақиқат.
Көрерменге театр тамашалағандай әдемі әсер қалдырған салтанатты шараның екінші бөлімі мерейтой иесіне арналған ақжарма тілектерге жалғасты. Жетісу облыстық «Жетісу» радиосының басшысы, «Алтын тобылғы» және «Алтын қалам» жүлдесінің иегері, жазушы Есболат Айдабосын тізгіндеген әдеби-сазды кештің алғашқы сөз тиегін Парламент Сенатының депутаты, мемлекет және қоғам қайраткері Дархан Қыдырәлі ағытты. Жүрекжарды лебізінде қаламы жүрдек журналистің отандық бұқаралық ақпарат құралдарын дамытуға қосқан үлесін айрықша атай келе, Гүлзейнеп Сәдірқызына Парламент Сенатының Құрмет грамотасын тапсырды. Сонымен қатар Президент кеңесшісі Мәлік Отарбаевтың жылы лебізін жеткізді.
«Гүлзейнеп әпкеміз «Egemen Qazaqstan» газетіне алғаш стенографист болып жұмысқа қабылданған. Сөйте жүріп өзінің жазу стилін қалыптастырды. Қаламынан туындаған әлеумет, саясатқа қатысты өткір де өзекті тақырыптары Парламент мінберінен депутаттық сауал ретінде жолданып, елдік мәселелердің шешім табуына үн қосты. Жалпы, қазақ әйелі дегенде – әсемдіктің, сұлулықтың, адалдықтың, бейнеткештіктің, төзімділіктің, мейірбандықтың келбеті келеді. Гүлзейнеп Сәдірқызы – өзі де, сөзі де көркем, жаны да, жазуы да сұлу журналист-жазушы. Күрмеуі қиын күрделі мәселені де газет бетінде қыздың жиған жүгіндей етіп көрсете білді. Екіншіден, отбасына, кәсібіне, өзі 45 жылға жуық жұмыс істеген «Егемен Қазақстан» газетіне адалдығын атар едім. Қазақтың қабырғалы қаламгерлерінің тәлімін алды, тәжірибесін ұштады», деген Дархан Қыдырәлі журналист Гүлзейнеп Сәдірқызы үлкен жүректі, қазақтың қайсар қызы екенін айрықша атады. Жаны нәзік журналистің өзі шекпенінен шыққан Халық жазушысы Шерхан Мұртазаға жасаған қамқорлығын мысал етті.
Салтанатты шарада Премьер-министрдің орынбасары – Мәдениет және ақпарат министрі Аида Балаеваның мерейтой иесіне жолдаған құттықтау хатын «Қазақ газеттері» ЖШС Алматы филиалының басшысы Бағашар Тұрсынбайұлы оқып берді. Құттықтау хатта: «Өзіңізді ұлттық журналистикада өз қолтаңбасын қалыптастырып, қазақ баспасөзінің мазмұнын байытқан қаламгер ретінде құрметтейміз. Көп жыл ғасырлық тарихы бар «Egemen Qazaqstan» газетінде әлеумет, руханият, мәдениет салаларындағы өзекті мәселелерге қалам тербеп, отандық ақпарат кеңістігінің дамуына елеулі үлес қостыңыз. Қаламыңыздан туған прозалық шығармаларыңыз оқырман олжасына айналып, әдебиетсүйер қауымның шынайы құрметі мен ықыласына бөленіп келесіз. Мерейлі жасыңызбен құттықтай отырып, сізге зор денсаулық, шығармашылығыңызға толайым табыс, әулетіңізге амандық пен баянды бақ тілеймін!», делінген.
Өз кезегінде өңір басшысының ыстық ықыласын жеткізген облыс әкімінің орынбасары Ғани Майлыбаев та журналист Г.Сәдірқызының қаламына адалдығы мен еңбекқорлығын ерекше атап өтті. Ал ақындар мен батырлар елі атанған Жамбыл ауданының әкімі Нұрлан Ертасұлы сахна төрінде Гүлзейнеп Сәдірқызына қазақы дәстүрмен сый-құрмет көрсетті.
Мінбеде сөз алғандар қатарында белгілі ақын, әйгілі «Көк тудың желбірегені» атты әннің сөзін жазған Алмас Ахметбекұлы қандастар атынан сөз алып, Гүлзейнеп Сәдірқызының көші-қон саясатын сынға алған «Көш-керуен кері бұрылып кетпесе екен...» атты мақаласын дүниежүзі қазақтары қалай жылы қабылдағанын, журналистік пайымы мен қаламының қарымы сырттан келетін қандастар туралы заң қабылдауға қалай әсер еткенін мысал етті. Сөйтіп, Гүлзейнеп Сәдірқызын «мемлекеттік саясатқа өзгеріс әкелген журналист» деп бағалап, қандастар атынан ат мінгізді.
Шығармашылық кешке есімдері елге танымал «егемендік» Жұмагүл Солты, Сүлеймен Мәмет, Күмісжан Байжан, Қорғанбек Аманжол, Талғат Сүйінбай, Саясат Бейісбай, Серік Пірназар сынды ардагер-журналистер мен қазіргі қызметкерлердің бір тобы қатысты. Әріптестер атынан сөз алған «Egemen Qazaqstan» газетінің бас редакторы Ғабит Мүсіреп алдымен «Қазақ газеттері» ЖШС директоры Дихан Қамзабекұлының арнайы құттықтауын тапсырды. Онда Гүлзейнеп Сәдірқызын кәсіби тұрғыда елеулі үлес қосқан қаламгер ретінде ерекше бағалайтыны, «Перзентхана пердесі... талай сырды бүркеп тұр» атты сериялық мақалаларынан бастап, «Айдалада ақ отау», «Аты ғана ардақты ма?», «Әкесі өлген қандай-ды», басқа да көлемді проблемалық мақалаларының қоғамға қозғау салғанын атады.
«Бұл аталған газеттің сол кездегі тілшісінің қаламынан туған мақалаларының өзектілігін көрсетеді. Осындай талантты перзенттерін ардақтап отырған ақындар мен батырлар елінің жұртшылығына мың алғыс», деді бас редактор.
Проза жанрындағы шығармашылығы мен ерекшелігі де кеңінен сөз болды. Бұл орайда Жазушылар одағының хатшысы, Әл-Фараби атындағы Қазақ ұлттық университетінің профессоры Қансейіт Әбдезұлы, көрнекті сыншы, жазушы Әмірхан Меңдеке оралымды ой-пікірлерін ортаға салды. Мерейтой иесіне Жазушылар одағының мүшелігіне қабылданғаны туралы куәлік пен төсбелгісін тапсырды.
«Жамбыл елінің қолына қалам ұстаған перзенттері тағы жиылып, қазақтың талантты журналисіне, қаламгеріне құрмет көрсетіп отырсыздар. Өте ризамын. Бұл – елдің тойы. Міне, осы қасиетті топырақтан түлеп ұшқан Гүлзейнеп Сәдірқызының да қуатты қаламы қазақ руханиятының қоржынын құнды шығармалармен байытып отыр», деді Әл-Фараби атындағы Қазақ ұлттық университетінің профессоры Қансейіт Әбдезұлы.
Әдеби-сазды кеште «Өлке тынысы» ЖШС директоры, белгілі ақын Кәдірбек Құныпияұлы жырдан шашу шашса, Журналистер одағының облыстық филиалының басшысы, «Алатау арайы» газетінің бас редакторы Қуаныш Тұңғатар да ізгі тілегін жеткізді.
Әуезді әнмен өрілген салтанатты шара соңында қаламгер Гүлзейнеп Сәдірқызының «Әйел жаны» атты прозалық жинағы мен «Қанекей, қалам, сөйлеші» кітаптарының тұсауы кесілді. Кітап облыс әкімдігінің қолдауымен жарық көрді.
Бүгінде қаламгер шығармаларына өзек болған Ақтерек ауылы көркейіп келеді. Оған төл перзентінің қосқан үлесі аз еместігін жерлестері атынан сөз алған «Ақтерек» шаруа қожалығының төрағасы, ауданның құрметті азаматы Темірлан Шайнүсіпов атап айтты. Сөйтіп, әйел жанының мың қатпар терең иірімдеріне бойлап, құнды шығармалар жазған журналист-жазушы, «Аққу ғұмырлы тағдыр», «Махаббатым жүрегімде», «Тау тұлға», «Алқа» баспасы мұрындық болған әдеби байқаудың бас жүлдесін қанжығалаған «Айбибі» әңгімелер мен повестер жинағының авторы, Журналистер, Жазушылар одағының мүшесі Гүлзейнеп Сәдірқызының мерейтойын өнер майталмандары Бағдат Сәмединова, Ұлжан Айнақұлова бастаған сахна саңлақтары әсем әнмен әрледі, жүректерді тербеді.
Алматы облысы,
Жамбыл ауданы
