Суретті түсірген – Ерлан ОМАР, «EQ»
Бұл – өткен жылдың осы кезеңімен салыстырғанда 7,3%-ға жоғары көрсеткіш. Демек, халықтың сұранысы артып, бизнестің берері көбейген. Сәйкесінше, қаржы айналымы бұрынғыдан жақсарған.
Бір жылда азық-түлік сатылымы 7,9%-ға өскен. Бұл халықтың тамаққа деген шығыны артқанын білдіреді. Ал киім мен тұрмыстық заттардың сатылымы 7%-ға көбейген.
Сауданы қыздырып жатқандар шетелдік алпауыттар емес, өз кәсіпкерлеріміз. Жыл басынан бері жекеменшік дүкендер мен компаниялар 20,6 трлн теңгенің тауарын сатқан. Бұл – барлық бөлшек сауданың 90,1%-ы. Яғни елдегі ақша айналымының басым бөлігі өз азаматтарымыздың қолында деген сөз. Шетелдік компаниялардың үлесі – небәрі 9,9%.
Сауда-саттық халқы тығыз орналасқан аймақтарда жақсы дамыған. Мысалы, тұрғыны көп Алматыда елдегі барлық бөлшек сауданың 33,6%-ы жасалады. Астананың үлесі – 14,2%. Қарағанды мен Шығыс Қазақстан да алдыңғы қатарда. Бұл өңірлерде халықтың табысы жоғарырақ, жұмыс та көп, сондықтан сауда-саттық та жақсы жүреді.
Бөлшек сауда көлемінің артуы халықтың тұтыну қабілетінің біртіндеп қалпына келе бастағанын көрсетеді. Бұл жерде тек ақшаның көптігі емес, нарықтың тұрақтылығы маңызды. Тұтынушы ертеңгі күнін ойлай отырып та сауда жасай алады. Сондықтан сауда өсімін ішкі нарықтың жандануынан бөлек, жалпы экономикалық ахуалдың оңалуымен байланыстыруға болады.
