Фотолар: Қорғаныс министрлігі
Үш бірегей қорғаныс жүйесінің авторы
PhD докторы подполковник Нұржан Зікірияев радиотехника және электроника саласындағы жетекші инженер-конструктор. Қарулы Күштер қатарында жиырма үш жылдық қызметінде ол отандық армия қарулануына қабылданған үш бірегей қорғаныс жүйесінің авторы атанды. Оның әзірлемелері қазіргі заманғы әскери техника бағыттарының негізгі спектрін қамтиды – оптикалық-электрондық кешендерден бастап радиоэлектрондық күрес пен ұшқышсыз авиацияға дейін және ондаған бытыраңқы құрылғылар әмбебап модульдермен алмастырылып, сенімділік, үнемділік және орналастыру жылдамдығы артады.
Жобалары – жауынгерлік мүмкіндіктерді арттырады
Ең маңызды жетістіктерінің бірі – әскери техника үшін көрінуді арттыруға арналған оптикалық-электрондық модульді әзірлеу және енгізу. Ол түнгі уақытта бақылауды және қозғалыс қауіпсіздігін айтарлықтай жақсартады, бұл сынақ нәтижелерімен дәлелденген.
Оның жұмысында бағдарламалық түрде анықталатын радио (SDR) технологияларын дамыту маңызды орын алады. Подполковник Н.Зікірияев арнайы SDR кешенін жасап, сондай-ақ әртүрлі мамандықтардың курсанттарына арналған «SDR негіздері» оқу құралын және оқу курсын дайындады.
Оның басшылығымен Wing Loong-1 ұшқышсыз ұшу аппараттарының аспа тораптарын жаңғырту жүзеге асырылып, жаңа қару-жарақ түрлерін интеграциялауға және кешеннің жауынгерлік мүмкіндіктерін айтарлықтай кеңейтуге мүмкіндік берді.
Армиядағы цифрлық трансформация
«Республикалық деңгейдегі бұл марапат әрі қарай жұмысты жалғастыруға үлкен серпін. Барлық жобалар әскердің жауынгерлік мүмкіндіктерін арттыруға және практикалық қолдануға бағытталды. Басты міндет – жинақталған тәжірибені курсанттарға жеткізу және жаңа буын әскери инженерлерін даярлау», деді подполковник Н.Зікірияев.
Айта кеткен жөн, оның әр әзірлемесі – армияны цифрлық трансформациялау бағытындағы стратегиялық қадам. Подполковник Н.Зікірияевтің жұмысы отандық инженерлік мектептің әлеуетін және елдің қорғаныс қабілетін бүгінгі күні-ақ күшейтетін технологиялар жасауға қабілетті екенін айқын көрсетеді.
