Суреттерді түсірген – Жеңіс Ысқабай
Шығармашылыққа адалдықтың, руханиятқа қызмет етудің, жарты ғасырлық еңбектің лайықты бағалануы ретінде қабылданған бұл жаңалық театр ұжымын ғана емес, тұтас Жетісу жұртшылығын ерекше қуанышқа бөледі. Талдықорған театрының тарихы 1975 жылдан бастау алады. Театр шымылдығын алғаш болып Ғабит Мүсіреповтің «Қозы Көрпеш – Баян сұлу» пьесасы ашқан сәттен бастап, бұл ұжым өнер әлемінде өзіндік қолтаңбасын қалыптастырып, қазақ театр мәдениетінің дамуына зор үлес қосып келеді.
Биыл 50 жылдығын атап өткен өнер ордасы осы уақыт аралығында жүздеген қойылым қойып, талай талантты түлетіп шығарды. Алмахан Кенжебекова, Әлихан Ыдырышева, Лидия Кәденова, Дулыға Ақмолда секілді халық әртістері еңбек ететін театр бүгінде шығармашылықтың шынайы мектебіне айналған. 145 адамнан тұратын ұжымның 61-ін жастар құрайды. Бұл – театрдағы дәстүр сабақтастығының, жаңа буынның қалыптасуының айқын көрсеткіші. Театр директоры Ерлік Тілеуқұлұлы Көркемдік бұл жаңалықты театр тарихындағы ең жарқын белестердің бірі деп бағалады:
«Жарты ғасырлық жолымызда көрерменнің сенімін ақтауға, сахна мәдениетін биіктетуге тырыстық. Әр премьера, әр құрмет, әр қошемет – ортақ тарихымыздың алтын парағы. Академиялық мәртебе – тек атақ емес, біздің өнерге деген адалдығымыздың, ұлт руханиятын дамытуға қосқан үлесіміздің жоғары бағалануы. Бұл мәртебе – әрі қуаныш, әрі үлкен жауапкершілік», дейді ол.
Жетісу өңірінде театр мәдениетінің дамуына ықпал етіп келе жатқан тағы бір маңызды жоба – «Biken Fest» халықаралық фестивалі. Облыс құрылғаннан бері үздіксіз ұйымдастырылып келе жатқан бұл өнер мерекесі биыл Өзбекстан, Әзербайжан, Грузия, Қырғызстан басқа да елдерден келген 9 театрды біріктіріп, шығармашылық тәжірибе алмасудың бірегей алаңына айналды. Фестивальдың тұрақты өтуі Талдықорған театрының халықаралық беделін арттырып, кәсіби байланыстарын кеңейте түсті.
Халық әртісі Алмахан Кенжебекова бұл мәртебені үлкен серпіліс ретінде қабылдап, алдағы жоспарларымен бөлісті.
«Академиялық атақ – бүкіл ұжымның табанды еңбегінің нәтижесі. Бұл біздің халықаралық деңгейдегі жобаларға кеңінен қатысуымызға, жас әртістердің кәсіби дамуына, жаңа шығармашылық зертханалар ашуға жол ашады. Театр – қоғамның айнасы. Біз сол айнаға заманауи ой, ұлттық рух, терең мәдениет бейнесін түсіруді жалғастыра береміз», дейді ол.
Ал академиялық мәртебе – театрдың жаңа белесі. Бұл атақ ұжымға жаңа мүмкіндік, жаңа міндет жүктейді. Жарты ғасырлық тарихы бар өнер ордасы енді академиялық деңгейде жаңаша өрлеу кезеңіне қадам басады.
Жетісу облысы
