«Маңғыстау» вокзалында болашақ ғимараттың іргетасын құю аяқталып, тіреу қабырғаларын арматуралау, «Бейнеу» вокзалында жерасты қабатын жабын плиталарымен жабу, биіктігі 6 метр болатын бірінші қабаттың колонналарын орнату іс-шаралары атқарылып жатыр. «Шетпе» вокзалында болашақ ғимараттың іргетасын құю аяқталып, жертөле қабырғаларын монтаждау, колонналарды қалыпқа келтіру, арматуралау қолға алынған. «Қазақстан темір жолы» ҰК» АҚ тапсырысымен жүзеге асып жатқан кешенді реконструкциялау еліміздің туристік әлеуетін арттыруға бағытталып отыр.
Өңірде жол құрылысына, қатысты шаруалар барынша өзекті. Өйткені ол – келешегін туризммен байланыстырған өңірдің күретамыры. Сол себепті облыста жол құрылысы жобалары жетерлік.
– Жетібай – Жаңаөзен – Кендірлі – Түрікменстан шекарасы автомобиль жолының 65–179 шақырым учаскесін орташа жөндеу жұмысы биыл тамыз айында басталды. Бұдан бөлек, осы жолдың 179–229 шақырым учаскесінде күрделі жөндеу жұмысы басталады, – деді облыстық жолаушылар көлігі және автомобиль жолдары басқармасының басшысы Бейнеубек Әбілов.
Сондай-ақ «Air Astana» әуе компаниясы Сауд Арабиясының Джидда, Медина қалаларына тікелей рейстерді іске қосқан. 2025 жылдың 29 қарашасынан бастап «Fly Arystan» әуе компаниясы Біріккен Араб Әмірліктерінің Дубай қаласына аптасына бір рет, сенбі күндері тікелей ұшатын рейс ашуды жоспарлап отыр. Сонымен қатар биыл Көлік министрлігі Азаматтық авиация комитетінің қолдауымен Ақтау – Көкшетау, Ақтау – Түркістан әуе рейстері ашылды. 2025 жылдың 23 қыркүйегінен Ақтау – Қарағанды бағытында тікелей әуе рейстері ұша бастады.
Облыстық жолаушылар көлігі және автомобиль жолдары басқармасының бас маманы Мұрат Асадуллаев Маңғыстауда облыстық маңызы бар автомобиль жолы кезең-кезеңімен жаңартылып жатқанын айтады. Мысалы Форт-Шевченко – Ақтау – Форт-Шевченко бағытындағы автожолдың 30 шақырымын реконструкциялау жұмыстары жүргізіліп жатыр. Үш кезеңге бөлінген жобаның бірінші кезеңінде жолдың 43–73 шақырымын, екінші кезеңінде 73–104 шақырымын реконструкциялау, үшінші кезеңде 104–132 шақырымын орташа жөндеу жұмысы жүргізіледі. Жоба облыстың көлік инфрақұрылымын дамытуға, өңір ішінде көлік қатынасының қауіпсіздігін арттыруға бағытталған.
– Қазір автомобиль жолының 17 шақырым аумағында асфальтбетон жабынының бірінші қабатын төсеу жұмыстары аяқталды. Сонымен қатар 6,7 шақырым жол аумағында жолдың төменгі қабаты мен негізін дайындау жүргізіліп жатыр. Құрылыс-монтаж жұмысы бекітілген өндірістік кестеге сәйкес орындалды. Атқарылған шаруалардың нәтижесінде жолдың сапасы жақсарып, көлік қатынасының қауіпсіздігі мен қозғалыс жылдамдығы артты, – деді М.Асадуллаев.
Жол жайлылығы – экономиканың ғана емес, мәдениеттің де көрінісі. Сондықтан жолды жақсарту, жаңғырту – аса маңызды іс.
Маңғыстау облысы
