Өнер • 27 Қараша, 2025

Өнер биігіндегі «Салтанат»

60 рет
көрсетілді
2 мин
оқу үшін

Биыл «Салтанат» мемлекеттік би ансамблінің құрылғанына – 70 жыл. Аты аңызға айналған ұжым халқымыздың би өнерін әлемге әйгілеп келеді.

Өнер биігіндегі «Салтанат»

Сурет: ansamblsaltanat.kz

Мерейтой аясындағы маңызды іс-шара ан­самбльдің тарихына ар­налған кітаптың тұсаукесерімен бас­талды. Ұжымның қалыптасу кезеңі, шығармашылық ізденістері мен жетістіктері жан-жақты қамтылған жаңа басылымды таныстыру рәсіміне композитор, Еуразиялық мәдениет қорының президенті, академик Ерұлан Қанапиянов, «Салтанат» мемлекеттік би ансамблінің директоры Елубай Кенжалиев, ардагерлер Мұхаметрахым Дәуітов, Қайрат Мұқанов, меценат Сабыржан Молдаханов, өнер майталмандары қатысты.

Ұлттық өнердің, рухани бай­лықтың, шеберлік пен шабыттың ордасына айналған ұжымның мерекесі Қазақстан халқы Ассамблеясының 30 жылдығымен орайласып, Алматытеатрында Ел «Салтанаты» мерейтой­лық концертіне ұласты. Сахна төрінде «Алтынай» мемлекеттік халық би ансамблі, Республикалық мемлекеттік академиялық корей музыкалық комедия театры, Мемлекеттік Құдыс Қожамьяров атындағы ұйғыр музы­калық комедия театры, «Бахар» би ансамблі, әнші Өмірқұл Айниязов, «Дарын» мемлекеттік жастар сый­лығының лауреаты, күйші Таңат Сәденов, республикалық кон­курстардың лауреаты, дәстүрлі әнші Жайна Тарғынова кештің көркін қыздырды.

Өскелең ұрпақты өнерге баулу, туған елге деген сүйіспеншілігін арттыру мен ұлтаралық достықты нығайтуды мақсат еткен мерекелік кеште «Салтанат» ансамблі жанынан құрылған фольклорлық ансамбль әуезді ән мен күмбірлеген күйден шашу шашса, мың бұралған бишілер ұлттық және әлем халықтарының биін салт-дәстүрдің өрнегімен астастырып, көрерменін ерекше әсерге бөледі.

«Салтанат» мемлекеттік би ансамблі биыл «Би керуені» жобасы аясында Түркістан, Ақтөбе, Солтүстік Қазақстан облысында және Шым­кент, Тараз қалаларында гала-концерт, шеберлік сабақтары мен фотокөрме өткізді. Кәсіби мамандардың шеберлік сабақтарына 1000-нан аса хореограф, бишілер қатысып, арнайы сертификат табысталды.

 

АЛМАТЫ