Атап айтсақ, «RG BRANDS Kazakhstan», «Coca-Cola Almaty Bottlers», «Hamle Company LTD», «Asia Agro Food», «Efes Kazakhstan», «Kagazy Recycling», «Kelun – Kazpharm» сияқты кәсіпорындар бар. Ауданда жаңа инвесторларды тарту бағытында жүйелі жұмыстар жүргізіліп жатыр.
Биылғы қаңтар-қыркүйек айларында негізгі капиталға тартылған инвестицияның 85 пайызы жекеменшік инвестициялар есебінен жүзеге асырылды. Бұл – ауданның инвестициялық тартымдылығы жоғары, бизнес жүргізу үшін қолайлы өңір екенін көрсетеді. Аталған кезеңде 10-ға жуық ірі жобалар іске қосылып, шамамен 2300 жаңа жұмыс орны ашылды. Көкөзек ауылында Оңтүстік Кореялық «KT&G» компаниясының зауыты іске қосылып, 140 жұмыс орны құрылды. Исаев ауылында «Фокус Логистик» кешенінің 1-ші және 2-кезеңдері іске қосылып, жалпы 1500 адам жұмыспен қамтылды. Кешен толық қуатымен жұмыс істеген жағдайда, 4,5 мың жаңа жұмыс орны құрылады. Ауданның бюджетіне жыл сайын 5 млрд теңгеден астам салық түсуге тиіс. Бұдан бөлек, жуырда «Apple Logistics» кешенінің бірінші кезеңі аяқталып, 148 адам тұрақты жұмысқа орналасты. Сондай-ақ «Neo Milk» компаниясы ешкі, бие, түйе сүтін құрғатып өндіретін зауыттың құрылысын аяқтап, 50 адамды жұмыспен қамтыды.
«Raw Production Ltd» құс етін қайта өңдеу зауыты іске қосылып, 100 адам тұрақты жұмысқа орналастырылды. Бұған қоса «Боралдай контейнер терминалы» құрылысы толықтай аяқталып, 70 жұмыс орны ашылды.
«Президент Қасым-Жомарт Тоқаев «Инвестиция тарту – орталық атқарушы органдардың ғана міндеті емес, жергілікті билік пен әкімдердің де жауапкершілігі», деп атап өткен еді. Осы талап үдесінен шығып, ауданымызда инвестициялық ахуалды жақсарту үшін нақты шаралар қабылданып, жаңа жобаларды іске асыру жұмыстары белсенді түрде жүргізіліп жатыр. Биыл жалпы құны 100 млрд теңгеден асатын 20-ға жуық жаңа ірі инвестициялық жоба іске асырылуда», дейді Қарасай ауданының әкімі Жасұлан Естенов.
Негізгі жобалар қатарында «MP Solutions» логистикалық кешенінің құрылысы (14 млрд теңге), «Jiang nan Kazakhstan» компаниясы өнеркәсіптік логистикалық аймақ (10 млрд теңге), «Алға Макс» полистиролбетон плиталарын өндіретін зауыты (5 млрд теңге), «Atek group» автоклавты кірпіш зауытының құрылыс жобалары (1,2 млрд теңге) бар.
Одан бөлек, «Casрian Beverage Holding» алкогольсіз сусындар шығаратын жаңа зауыт салу үшін дайындық жұмыстарын жүргізіп жатыр. Жобаға 15,8 млрд теңге инвестиция тартылады. Бұл бастамалар ауданның инвестициялық тартымдылығын арттырып, жаңа өндіріс орындарын ашуға және жұмыссыздықты азайтуға айтарлықтай серпін бермек.
Биыл тамыз айынан іске қосылған «Burunday container terminal» (Боралдай контейнер терминалы) ЖШС операциялық директоры Асқар Жұмаділовтің айтуынша, көпсалалы контейнерлік терминалға алыс-жақын шетелден тәулігіне 100-120 контейнер келіп, оны уақтылы қабылдап, жүктерді түсіріп, сақтап, сұрыптауға мүмкіндік жасалған. Жүктің негізгі бөлігін – шетелден тасымалданатын автокөліктер құрайды. Мультимедиялық терминалдың басты айырмашылығы – тұтынушыға «жеке кабинет» ашылып, сол арқылы 24 сағат өз жүгін бақылай алатынында.
Жалпы аумағы 16,5 шаршы метрге орналасқан контейнерлік алаң халықаралық стандарттарға сай жабдықталған әрі толықтай автоматтандырылған. Мамандар бұл нысан – Алматы агломерациясы мен басқа аймақтар үшін халықаралық және ішкі жүк тасымалын оңтайландыратынын айтады. Сондай-ақ логистикалық компаниялар мен өндірушілерге қоймалау, кедендік және экспедиторлық қызметтерді бір жерден алуына мүмкіндік береді. Терминалда бүгінде 40 адам еңбекпен қамтылған. Толық қуаттылығы жүзеге асқанда жұмысшылар санын 150 адамға жеткізу жоспарланған.
Жармұханбет ауылында орналасқан «Almaty Turmystyq Tehnika Zavody» (Алматы тұрмыстық техникалық зауыты) ЖШС заманауи тұрмыстық техника өндірумен айналысып келеді. 2021 жылы іске қосылған кәсіпорынның өнімдері «Dauscher» сауда маркасымен танымал.
Жобаның мақсаты – ішкі нарықтың қажеттіліктерін өтеуге және импортқа тәуелділікті айтарлықтай төмендетуге қабілетті тұрмыстық техниканың толыққанды, тәуелсіз өндірісін құру. Бүгінде кәсіпорын газ бен электр плиталарын, пештерді, шағын пештерді шығарады. Алдағы уақытта тоңазытқыштар, мұздатқыштар мен теледидарлар шығару жоспарланса, бүгіннің өзінде алғашқы тапсырыстар қабылданып, тұтынушылар тілегін қанағаттандырған.
Зауыттың өндірістік қуаты кезең-кезеңімен жүзеге асырылып жатыр. Жыл сайын жаңа жоғары технологиялық цехтар, оның ішінде металл өңдеу, автоматтандырылған сырлау, эмальдау цехтары, сондай-ақ полистирол көбік қаптамасын өндіру учаскесі пайдалануға беріледі. Кәсіпорынның қуаттылығы жылына 200 мың бірлікке дейін өнім шығаруды, 200-ден астам жұмыс орнын ашуды көздейді.
Бүгінде «Almaty Turmystyq Tehnika Zavody» ЖШС өнімдері Technodom, Sulpak, Mechta, Fora сынды еліміздің ірі сауда желілерінде ұсынылған. Сондай-ақ бес фирма сауда нүктелерінің желісі жұмыс істейді.
«АТТЗ» ЖШС директоры Арсен Күштаев кәсіпорынды кеңейте отырып, отандық тұтынушылардың сапалы да сенімді әрі бәсекеге қабілетті тұрмыстық техникаға қол жеткізуін қамтамасыз ету – басты мақсат екенін айтты.
Қуаты толық іске қосылғанда тәулігіне 200 мың тұрмыстық техника түрлерін шығаруды діттеген зауытта биыл 65 мың техника шығарса, келер жылы өнімді еселеп, 130 мыңға жеткізу жоспарланған. Әр шаңырақтың тұрмысын жеңілдетуге септігін тигізер техникаларды жасауда Еуропаның танымал компанияларынан бөлшектер сатып алынатындығын алға тартты.
«Біз өндірген техниканың 50 пайызы Ресей, Қырғызстан мен Өзбекстанға экспортқа жөнелтіледі. «Қазақстанда жасалған» деген брендті тұтынушылар жылы қабылдап жатыр. Өндірісте ел бойынша 2-орындамыз. Басты қағидамыз – адам ағзасына зиянсыз жоғары сапада әрі қолжетімді болу. Осы себепті, кей бөлшектер шетелден алынады. Мысалы, пешке керек әйнекті Германиядан, электорниканы Испаниядан, оттықтарын Италиядан, эмальдың бояуларын Ресейден, ал металл өнімдері өзімізде өндіріледі», дейді зауыт директоры Арсен Күштаев. Бұл күнде 100 шақты адам еңбек ететін зауыттың инвестиция көлемі 7,5 млн доллар. Былтыр 2,5 млн доллар салынып, жаңа цехтар іске қосылды.
Алматы облысы
