- Ерлер арасындағы әлемдік рейтингте еліміздің бірінші ракеткасы Александр Бублик 11-орында тұр. Бұл оның мансабындағы ең үздік көрсеткіш. АТР-дің ТОП-10-дығына Карлос Алькарас (Испания), Янник Синнер (Италия), Александр Зверев (Германия), Новак Джокович (Сербия), Тэйлор Фриц (АҚШ), Бен Шелтон (АҚШ), Алекс де Минуар (Аустралия), Феликс Оже-Альяссим (Канада), Лоренцо Музетти (Италия), Джек Дрейпер (Ұлыбритания) сынды дүлдүлдер еніп отыр.
- Мысыр елінде нысана көздеуден өтіп жатқан әлем чемпионатының құрамында Александра Ле, Арина Малиновская, Елизавета Безрукова сынды мергендері бар еліміздің құрамасы 50 метрге үш қалыптан ату сайысында қола медаль иеленді. Жерлестерміз Қытай мен Швейцариядан ғана қалып қойды.
- Футболдан жасөспірімдер арасындағы (U-17) әлем чемпионатының іріктеу турнирінде еліміздің құрамасы сенсациялық нәтижеге қол жеткізді. Бауыржан Сағындықтың шәкірттері Хорватияның Неделище қаласында өткен матчта алаң иелерін 2:1 есебімен ұтты. Кездесудің 2-минутында Ислам Рақым мергендік танытса, 33-минутта Юрий Фриган таразы басын теңестірді. Ал 45-минутта Расул Әкімов нысананы дәл көздеді. Осы есеп ойынның соңына дейін сақталды.
- Теннистен Лионда өтіп жатқан «Челленджер» санатындағы турнирдің алғашқы айналымында Михаил Кукушкин ұлыбританиялық Билли Харристі ұтты. 1 сағат 40 минутқа созылған сайыс 7:6, 7:5 есебімен аяқталды. Енді отандасымыз франциялық Люк ван Ашеммен күш сынасады. Бейбіт Жұқаев кезінде АТР рейтингінде 21-орынға дейін көтерілген 35 жастағы Германияның сақа спортшысы Ян-Леннард Штруффқа есе жіберді – 7:6, 6:7, 4:6.
- 20 желтоқсанда Алматыдағы Балуан Шолақ атындағы спорт сарайында кәсіпқой бокс кеші өтеді. Жарыстың басты жекпе-жектерінде Елшат Нығметолла (21-0-2, 8 КО) мен Армат Арманұлы (5-1, 4 КО) айқасады. Екеуі де WBA Asia нұсқасының чемпиондық белбеуіне таласады. Олардың қарсыластары әзірге белгісіз. Сондай-ақ Еділ Қожамбердиев (16-2, 16 КО), Әлішер Абдуләлім (6-0, 4 КО), Элина Базарова (1-0, 1 КО), тағы басқа танымал былғары қолғап шеберлері өнер көрсетеді.
